Tor Gunnar Nystad (NSR) lea ilus go sámediggeráđđi lea árvalan lasihit doarjaga Oslo Sámi Vissui, muhto son dáhttu Oslo suohkana čuovvolit ja juolludit seamma olu go Sámediggi.
Tor Gunnar Nystad (NSR) lea ilus go sámediggeráđđi lea árvalan lasihit doarjaga Oslo Sámi Vissui, muhto son dáhttu Oslo suohkana čuovvolit ja juolludit seamma olu go Sámediggi.
Sámedikkeráđi bušeahttaárvalus 2016 várás lea gohčoduvvon seastinbušeahttan, muhto Tor Gunnar Nystad (NSR) beroštuvvá doaimmahit áššiid vaikke rámmat leat ge gáržásat. Son lea hui ilus go sámedikkeráđđi lea vuoruhan lasihit doarjaga Oslo Sámi Vissui, ja dál dáhttu Nystad Oslo suohkana mielde dása.
– Mii leat buohkat ovttaoaivilis das ahte Oslos dárbbašuvvo sierra sámi viessu, ja Oslo sápmelaččain lea áigumuš ovdánahttit Sámi Viesu ollislaš kulturásahussan, muitala Nystad preassadieđáhusa bokte.
Bušeahttaárvalus man Sámedikki dievasčoahkkin meannuda juovlamánus, lea árvaluvvon 150 ruvnno lassin, dát mielddisbuvttášii ahte Sámi Viessu oččošii 715 duhát ruvnno njuolggodoarjaga Sámedikkis 2016:s.
Muhto jus ollislaš sámi kulturásahus galggaš duohtandahkkot oaivegávpogis, de oaivvilda Nystad ahte Oslo suohkan maid ferte searvat dása.
– Galgá leat várri vuoruhit
Nystad oaivvilda ahte Oslo suohkan galgá juolludit Sámi Vissui seamma olu doarjaga go Sámediggi.
– Mii leat ožžon čielga dáhkádusaid Oslo suohkanpolitihkkáriin, earret eará Oslo Bargiidbellodagas, go leat muitalan ahte lea dáhttu searvat ovdánahttit Sámi Viesu. Dása gal galggašii juollut ruhta, go diehtit ahte Oslo suohkana doaibmabušeahtta lea eanet go 51 miljárdda ruvnnu, dadjá sámedikkeáirras Nystad.
Sávvá eará sámedikkeáirasiid maid čuovvolit
Vuosttažettiin sávvá Nystad ahte dat eará sámediggeáirasat maid oidnet nana, sámi kulturásahusa oaivegávpogis dehálažžan.
– Sávan ahte maiddái dat eará joavkkut leat ovttaoaivilis muinna das man dehálaš Sámi Viessu Oslos lea, ja ahte árvalus dohkkehuvvo go bušeahtta meannudat juovlamánus, dadjá Nystad.
– Ja jus Bargiidbellodaga ođđa gávpotráđđi duohtandahká válgalohpádusaid, de Oslos fargga lea dakkár Sámi Viessu mii riikka oaivegávpogis berre leat, loahpaha Nystad.
