-Almmuhus-
-Almmuhus-
MÁNÁT JA NUORAT Hástala eará bello­dagaid váldit oahpa­halliid

Hástala eará bello­dagaid váldit oahpa­halliid

-

-

Sara Katrine Aleksandersen (20) lea mielde NSR oahpahalliprográmmas Sámedikkis, ja hástala eará bellodagaid bargat dan seamma.

– Mun hástalan eará bellodagaid maid bovdet sin nuoraid searvat, ja lágidit sidjiide hárjehallanortnega. Lea dehálaš ahte nuorat ohppet mo Sámediggi doaibmá, dadjá Sara Katrine.

Son muitala ahte oahpahalliprográmma bokte beassá son, nuorra miellahttu NSR:s, čuovvut komitea- ja dievasčoahkkima oahppama dihtii.

– Mun jurddašan ahte nuorat berrejit áŋgiruššat politihkkii, dadjá Aleksandersen.

Son háliidivčče oažžut eambbo nuoraid politihkkii.  Čoahkkimiin maidda lea searvan, de lea dovdan iežas arvat nuorat go earát čoahkkimis.

Loga maid:
Sáme­diggi ii geasut nuoraid: – Politihkkárat eai leat čeahpit gula­hallat nuoraiguin

– Mun jurddašan ahte dát oahpahalliortnet, mas mun lean mielde, lea dehálaš ja vuogas vuohki nuoraide čájehit movt politihkka doaibmá, ja mun maid hástalan eará bellodagaid váldit sisa oahpahalliid, dadjá Sara Katrine.

Sara Katrine muitala ahte lea mannan hui bures ja lea oahppan olu čoahkkimiin. Son dadjá ahte lea oahppan mo vuogádat doaibmá, ja jurddaša ahte lea maŋit áigái ávkin jos galgá Sámediggái.

– Mu mielas orro dáppe hui čorgadis vuogádat. In dieđus sáhte dadjat nu olus eambbo dan birra, go in dovdda sin systema nu bures. Mu mielas mannet goit áššit hui njuovžilit, ja lea njuovžilis vuohki mo gieđahallet áššiid, dadjá Sara Katrine.

Áiggošii Sámediggái

Sara Katrine lea njealjádin NSR listtus Gáiseguovllu válgabiirres, ja ulbmil livčče beassat Sámediggái.

– Mun dieđusge sávan ahte beasan Sámediggái ja lean dan doaivvus ahte mun beasan. Boađán maid bargat dan ovdii ahte beasan dohko, muitala son.

Sara Katrine lea ieš nuorra, ja danin áigu son vuoruhit áššiid mat gusket nuoraide, ja maiddái ealáhuspolitihkkii.

– Dat lea somá ja dehálaš bargu leat servodatberošteaddjit, dadjá son go Ávvir jearrá lea go su mielas somá politihkket.

-Almmuhus-