Leif Anders Somby doarju Hendá Smuk videoalmmuhemiid, ja hástala eambbosiid juohkit sullásaš videoid. Son lea Kárášjoga johttisámiid searvvi jođiheaddji, ja jáhkká jus eambbosat juhket dákkár videoid, de sáhttet váikkuhit boraspirehálddašeami ja politihka.
Leif Anders Somby doarju Hendá Smuk videoalmmuhemiid, ja hástala eambbosiid juohkit sullásaš videoid. Son lea Kárášjoga johttisámiid searvvi jođiheaddji, ja jáhkká jus eambbosat juhket dákkár videoid, de sáhttet váikkuhit boraspirehálddašeami ja politihka.
Smuk juohká videoid sosiála mediaide, go háliida olbmuid fuomášuhttit makkár boazodoalli árgabeaivi lea.
Kárášjoga johttisámiid searvvi jođiheaddji Leif Anders Somby rámida nuorra boazodoalli, ja hástala eambbosiid juohkit dákkár videoid.
– Hástalan sihke boazodolliid ja boanddaid juohkit dákkár videoid, čájehit makkár duohtavuohta lea. Váillahan raporttain ja mediain rievttes govvideami áššis. Jáhkán dat láivudahttá sin guđet oaivvildit ahte boraspiret galget leahkit nu olu go leat dál, lohká Somby.
Unohis filmmaid juohkit vai fuomášuhttit olbmuid
Somby čuovui NBR konferánssa mii lei Troandimis Tråante doaluin, gos boraspirehálddašeapmi maid lei fáddán.
– Dáčča eiseválddit orrot doarjume boraspiriid, eai ge boazodolliid ja sávzadolliid. Raporttain ii boahtán duohtavuohta ovdan. Go visualisere filmmaiguin, de olbmot oidnet ja boahtá ovdan duohtavuohta, lohká Kárášjoga johttisámiid searvvi jođiheaddji.
Son evttoha ráhkadit sierra joavkku Facebookii gosa sihke boazodoallit ja boanddat juhket videoid mat čájehit boraspiriid váikkuhusaid.
– Doppe sáhtášedje gávdnat diekkár govaid ja filmmaid mat čájehit duohtavuođa. Dat eai leat vuohkkasat oaidnit, ja bisána muitui. Áinnas midjiide boazodolliide, muhto maiddái hálddašeddjiide. Jovkui sáhtášii bovdet olbmuid geat berreše oaidnit daid, jus mahkáš láivuduvvojit garra čuoččuhusat ahte boraspire lea buorre, lohká Somby.
NBR doarju
Norgga Boazosápmelaččaid Riikkasearvvi (NBR) nubbijođiheaddji Per John Anti maid doarju evttohusa.
– Galggašii buot filmmaid čohkket, vai beasašii čájehit eiseválddiide, ja Birasgáhttendepartementii. Dat čájehivčče makkár árgabeaivi lea go gártet ná olu návddit. Jáhkán dat livččii ávkkálaš boraspireváttisvuhtii, go bidjá olbmuid jurdagiid johtui.
(Ášši joatká gova vuolábealde)
NBR lea gáibidan ahte sámi boazodoalloguovlluin galget unnidit boraspiriid, ja baicca diktit leavvat eará guovlluin.
– Mii eat oaččo áddejumi, in dieđe dihtet go, vai eai go oba beroš ge. Orru nu ahte sámi ealáhusa ala galget visot boraspiret. Ovdamearkka dihte Vestlánddas, doppe eai oba leat ge boraspiret, lohká Anti. Danne jáhkká ge buori jurdaga čohkket dákkár filmmaid.
Anti lea ieš šaddan goddit bohcco man boraspire lei lábmen.
Filmmaid, mat Facebookii ilbmet, son ii nagot geahččat.
– Dat ii leat somá, ealli bohccot biidnašuvvet, dan in nagot oaidnit ge, lohká son.
