-Almmuhus-
OĐĐASAT Hástá álbmoga vuolgit veahkkin badje­olbmuide gease­hit fuođđa­riid 

Hástá álbmoga vuolgit veahkkin badje­olbmuide gease­hit fuođđa­riid 

-

-

– Mii leat gieldda bealis jurddašan ahte livččii hui buorre jos eambbo olbmot, geain lea vejolašvuohta veahkehit, geasehit fuođđariid ealuid lusa veahkkin badjeolbmuide.

Sátnejođiheaddji Svein Atle Somby lea veahá fuolastuvvan go gieldda boazodolliin lea stuorra roassu go bohccuin lea heajos guohtun ja badjeolbmot šaddet guođuhit ja geasehaddat fuođđariid ijatbeivviid.

– Mii leat gal gullan ahte leat olbmot geat veahkahallet, ja dat lea hui buorre. Leat maid oaidnán medias ahte suodjalus galggašii maid veahkkin, muhto das lea oalle ollu eahpesihkarvuohta, ii ge leat dat čoavddus boahtán johtui, dadjá Kárášjoga sátnejođiheaddji Svein Atle Somby preassadieđáhusastis.

Ávkkálaš mátki

Kárášjoga gielda ja Kárášjoga Johttisámiid Searvi lea goabbáge juolludan 5000 ruvnno mainna gokčá bensiidnagoluid dán doibmii, muhto ii dat ruhta bistte nu guhká. Nu ahte mađi eambbo eaktodáhtolaččat  sáhttet bargat, dađi buoret, ja eambbo fuođđariid nagodit doaimmahit bohccuide.

– Dat han lea hui somá fitnat olgun vuojašeame skohteriin ja seammás lea ávkkálaš mátki, lohká sátnejođiheaddji vel loahpas.

Váldde oktavuođa

– Jos lea hállu ja vejolaš vuojestit meahcis mátkki, de sáhtát Kárášjoga Johttisámi Servviin váldit oktavuođa ja fállat iežat veahki.

Vuodjinlobiid hástalusaid gal gielda ja boazodoallu čoavdit ovttasráđiid, čállá Kárášjoga sátnejođiheaddji Svein Atle Somby preassadieđáhusastis. 

- Advertisement -
-Almmuhus-