Eallá go hurri Mieronis? De lea goit dát loddi hárvenaš guossi Guovdageainnus.
Guovdageaidnulaš Johan Isak Buljo lea áican hárvenaš lotti Mieronis, ikte lea giikana čađa govven lotti mátketelefuvnnain.
– In leat sihkkar, muhto mun jáhkkán dat lea hurri (dárogillii Orrfugl). Mun in leat oaidnán dán lotti ovdal. Soitet dieđusge earát oaidnán dáppe, muhto eai dáidde darvehan govvii, lohká Buljo.
Okto
Johan Isak lea oaidnán lotti moddii ja ikte gearggai guktii oaidnit lotti Vuolit Mieronis.
– Lea vissa okto jođus, eai goit oidno eará lottit. Mun lean geahčadan interneahtas loddegovaid, ja dát loddi orro seammalágan go hurri. Loddi lea stuorát go rievssat. Dat lea ruškeslágan, ii leat goit seamma čáhppat go garjá, muitala son.
Loddečeahpit geahčadan gova
Go Ávvir váldá oktavuođa Norgga Ornitologalaš servviin, de čohkke generálačálli, Kjetil Solbakken, iežas bargoskihpáriid geahčadandihti gova. Diibmobeali maŋŋel lea gearggus muitalit makkár lotti oidnet govas.
– Ii leat nu álki oaidnit go gova kvalitehta ii leat buoremus. Leat dattege áibbas sihkkarat ahte lea govva hurris dahje goahppilis. Dát lottit leaba hui seammaláganat, muhto goahppil lea stuorát. Mii árvvoštallat ahte Mieronis lea hurrenjiŋŋelas, čilge loddečeahppi.
Finnmárkkus leat 90 hurri
Hurrenjiŋŋelas lea ruškat, varris loddi lea ges vuolil čohkkesalit ja vuolil ges čáhppat. Hurrevarris soadjadolggit leat vielgadat. Hurri besse ja gávdno miehtá Norgga. Finnmárkkus leat hurrit unnán ja loddenálli lea bieđganan iešguđetge guovlluide.
– Mis lea vuogádat masa registreret lottiid, ja oainnán ahte Finnmárkkus leat registrerejuvvon 90 hurri. Guovdageainnus ii leat okta ge registrerejuvvon, soaitá danin go doppe hárve geavahit vuogádaga, čilge Solbakken.
Erenomáš?
Hurri lea vuonccesloddi ja eallá dábálaččat meahcceguovllus. Hurrenjiŋŋelas šaddá 40-45 centimehtera guhkki, hurrevarris ges badjelaš mehterbeali.
– Hurri girdá ja sirddaša báikkis báikái, danin ii galgga leat nu erenomáš áicat lotti Finnmárkkoduoddaris. Govvideaddji áicca lea dattege miellagiddevaš ja lea erenomáš fiinna duođaštus go lea govven lotti, lohká Norgga Ornitologalaš searvvi generálačálli Kjetil Solbakken.
