Njeallje dievddu sáhttet čalmmehuvvat maŋŋel go multiresisteanta baktera Burkholderia njoamui čuohpadeamis Áhkánjárggas.
Njoammuma fuomášedje go okta pasieanta dieđihii Áhkánjárgga klinihkkii maŋŋel čuohpadeami ja logai oainnu hedjonan, čállá Fremover aviisa.
Dál leat čuohpademiid bissehan Áhkánjárgga čalbmeklinihkas, go leat fuomášan baktera njommon njealljásii, ja Nordlándda doaibmi fylkkadoavttir Morten Juul Sundnes lohká NRK:i ahte leat bidjan bearráigeahču klinihkkii.
Dat njeallje dievddu leat dál Romssa universitehtabuohcciviesus (UNN).
Isket movt dan dálkkodit
Ii leat diehtu gos njoammumat leat boahtán, ja leat iskame makkár antibiotihka sáhttet geavahit dálkkodeapmái.
Dál jáhkket ahte bakterat leat njommon pasieanttaide čuohpadeami oktavuođas.
Buohkat dan 290 pasieanttas geat čuohpaduvvojedje ođđajagemánu 4. ja 28. beaivvi gaskkas, leat ožžon dieđu dáhpáhusa birra.
Lassin leat váldán iskosiid klinihkas.
Burkholderia baktera lea ožžon nama amerihkalaš patologa Walter H. Burkholderis ja lea namuhuvvon dušše moatti sajis máilmmis.
Ossodatbajitdoavttir Terje Christoffersen lohká baktera liikot sajiide gos lea lávttas.
(©NTB)
