-Almmuhus-
-Almmuhus-
-Almmuhus-
OĐĐASATHársttáid ja Giehta­vuona doalut

Hársttáid ja Giehta­vuona doalut

-

-

Hársttáin ja Giehtavuonas leat lágideame Sámi mánu, Sámi álbmotbeaivve oktavuođas.

Doalut leat jo álgán, ja maŋemuš vahkku ođđajagimánus leat leamaš “kick-off” ja čájáhusat, sámegielat lávvordat Hársttáin girjerádjosis ja oahppat mo coggá gávtti.

Guovvamánu 2. beaivve doallá Mathias Olsen, nuorra badjeolmmoš Grovfjordas, logaldallama mo Lulli-Romssa boazodoallu lea. Dát dáhpáhuvvá Trondenes Historiske Senteris ja álgá 18.00.

Guovvamánu 3. beaivve ávvudit Sámi álbmotbeaivvi UiT:s. Doppe gullá sáhkavuoruid ja doppe lea guoimmuheapmi. Dát álgá 11.00. Eahkes, 18.30 čájehit «Ellos eatnu» filmma Hársttáid kinos.

Guovvamánu 4. beaivve lea «Sámi beaivi» márkanguovddážis Hársttáin. Doppe guossuhuvvo biebmu, ja oahpahit njoarostit seammás go mánát besset gullat sámi muitalusaid ja mánáide lágiduvvo jiekŋa-disco. Kulturskuvlaoahppit guoimmuhit dánssain. Dát doalut álget 11.00. Várdobáikkis lea filbmačájáhus ja logaldallan sámi kulturmuittuid birra, dát doalut álget 14.00. Røkenes Gårdas lea eahkes sámi feastaeahket, báikkis guossohuvvo biebmu, muitalusat ja Issát Marainen guoimmuha lávddis, dát doalut álget 18.00.

Guovvamánu 5. beaivve lea ipmilbálvalus Hársttáid girkus 11.00 rájes. Lea maid ipmilbálvalus Giehtavuona girkus, dat maid 11.00 rájes.

Sámi álbmotbeaivve, guovvamánu 6. beaivve, lea olu mii dáhpáhuvvá. 10.00 levgejit ja lea sátnejođiheaddjiin iđitbiebmu. Simon Marainen guoimmuha buohcceviesu kantiinnas 11.15 ovdal go almmolaš ávvudeamit álget 11.30 Giehtavuona suohkanis gos sátnejođiheaddji doallá sáhkavuoru ovdal skuvlaoahppit ja Mikkel Per Sara guoimmuhišgohtet. Giehtavuonas lea maid njoarosteapmi, guossoheapmi ja guoimmuheapmi. 12.00 rahpasa čájáhus, mas historjjálaš gávdnosiid čatná sámi historjái, dát dáhpáhuvvá Giehtavuona suohkanviesus. 

16.00 rájes leat ávvudeamit Trondenes Historiske Senteris, gos guossohuvvojit biđus ja eará herskot. Leat doaimmat mánáide, filbmačájáhus buohkaide ja eará doaimmat. 18.00 álget ges Hársttáid suohkana almmolaš doalut, mas sátnejođiheaddji doallá sáhkavuoru, leat kultuvrralaš guoimmuheapmi ja sámi mánát guoimmuhit.

Guovvamánu 7. beaivve lea mánáidgárdemánáide lohkanboddu Hársttáin girjerádjosis. Mánáidgárddiide lea sáddejuvvon bovdehus.

Guovvamánu 8. beaivve álgá vuosttašluohkká mánáide lohkanboddu 09.15 ja 11.15. Lea maid fáddábeaivi, sámi kulturáddejupmi dearvvašvuođabálvalusas SÁNAG bokte. Dát álgá 12.00 ja lea Bikuben RRS Regionale Brukerstyrte Senteris. Lea nuvttá ja rabas buohkaide. 14.00 lea nuoraide fálaldat Kjelleren báikkis, doppe besset nuorat herskostallat sámi biepmuin.

19.00 lea kino, gos čájehit Britta Marakatt-Labba filmma «Historjá – Broderi for Sápmi». Doppe guossohuvvo bohccobiergomálli, dát dáhpáhuvvá Hársttáin kulturviesus.

Guovvamánu 9. beaivve álgá vázzinmátkin Olavgámmii. Mátki álgá biilabisánanbáikkis KOA olggobealde. Buohkat sáhttet searvat mátkái, ja lea nuvttá. Tuvra álgá 11.00.

18.00 lea logaldallan mo internáhttaeallin lei Finnmárkkus. Čáhcesullo journalista, Ingjerd Tjelle, muitala rávdnjema bokte. Dát dáhpáhuvvá Hársttáin girjerádjosis ja lea nuvttá buohkaide.

Guovvamánu 11. beaivve doallá Sigbjørn Skåden logaldallama «Livet i Markbygda – før og nå». Dát dáhpáhuvvá UiT:s Hársttáin ja lea nuvttá buohkaide. Logaldallan álgá 12.00.

Guovvamánu 12. beaivve lea sámi kulturvázzin Røkenesii. Deaivvadeapmi lea Røkenes Gård:s, ovdal go vázzájit oanehis mátkái ja loahpas gullat logaldallama mo sápmelaččat leat orron báikkis. Vázzinmátki lea nuvttá buohkaide ja álgá 13.00.

18.00 ges lea Beaivváš teáhteris «Bohtos dál dat beana» čájálmas Hársttáin kulturviesus.

Guovvamánu 16. beaivve doallá Tone Elvebakk logaldallama Tore Hunds čehporisa birra. Dát dáhpáhuvva Trondenes Historiske Senteris, 18.00 áigge. Lea nuvttá buohkaide.

Guovvamánu 18. beaivve lea Sámi lávvordaga Hársttáin girjerádjosis. Doppe lea vejolaš servvoštallat, speallat, herskostallat gáhkuin ja mánáide lágiduvvo muitalusboddu. Doalut álget 12 áigge ja lea nuvttá buohkaide.

Guovvamánu 23. beaivve loahpahit sámi mánu logaldallamin. Kjell Erland Pedersen logaldallá Hárstták sámi historjjá birra. Dát dáhpáhuvvá Hársttáin girjerádjosis ja lea nuvttá buohkaide.

-Almmuhus-