Borgemánus álget badjel 60 000 máná 1. luohkkái ja oallugat sis galget iehčanassii vánddardit skuvlii. Trygg Trafikk rávve váhnemiid geasset jo hárjehit mánáid vázzit iežaset skuvlageainnu vai šattaše oadjebassan ovdal go skuvllat álget.
64 proseantta mánáin vázzet dahje sihkkelastet skuvlii. 20 proseantta mánáin dolvojuvvojit biillain skuvlii, čájehit Stáhta geaidnodoaimmahaga 2020 logut.
– Mánáide lea buorre vázzit dahje sihkkelastit skuvlii go dalle besset lihkadit. Go unnit váhnemat vuojihit mánáid, de gártet unnit biillat skuvlageainnuid alde. Dat eastada lihkohisvuođaid go skuvlageainnut eai soaitte heivehuvvon nu ahte olu biillat johtet seamma sajis seamma áiggis. Dattege lea nu ahte muhtin mánáid ferte doalvut skuvlii, ja dalle lávet váhnemiid ávžžuhit bisánit heivehuvvon bisánanbáikái, lohká Trygg Trafikk sadjásaš oahpahushoavda Ida Neergaard preassadieđáhusas.
Vásihit johtolatváttisvuođaid
Stáhta geaidnodoaimmahat čađahii guovtti jagi áigi guorahallama mas iske man láhkai gaskal 5- ja 13-jahkásaš mánát mátkkoštit.
Dás boahtá ovdan ahte 40 proseantta váhnemiin vásihit ahte mánáin ii leat dorvvolaš skuvlageaidnu. 62 proseantta ges vásihit ahte skuvllaid luhtte leat johtolatváttisvuođat go mánát dolvojuvvojit dahje vižžojuvvojit skuvlla luhtte.
– Lea dehálaš ahte mánát hárjehallat ollesolbmo fárus vázzit dahje sihkkelastit skuvlii go sii han galget fargga vánddardišgoahtit okto. Dalle lea hui dehálaš ahte mánná dovdá iežas oadjebassan. Lea hirbmat vuogas geavahit oasi geasseluomus dan hárjehallamii, lohká Neergaard.
Oaneheamos luodda ii leat álo buoremus
Nuoramus mánát leat dávjá impulsiivvat, sii stohket, sii eai fuomáš buot mii dáhpáhuvvá birrasis ja sis lea unnán hárjáneapmi johtolagas. Sidjiide lea maid váttis áddet maid oidnet ja gullet, dasa lassin lea váttis árvvoštallat man guhkkin eret biila lea ja man leahtus dat boahtá.
– Lea dehálaš hállat mánáin ja jearrat maid oaidná, gullá ja vásiha go vázzá skuvlii. Ságastallama ja hárjehallama bokte šaddet mánát čeahpibun jurddašit, árvvoštallat ja áddet johtolatdilálašvuođaid. Lea maid dehálaš muitit ahte oaneheamos geaidnu skuvlii ii soaitte buot buoremus. Muhtin sajiin soaitá dorvvoleabbo čuovvut bálgáid ja eará geainnuid vaikke skuvlageaidnu veahá guhkku, muitala Neergaard.
Norggas ii leat mearriduvvon ahkemearri goas mánát sáhttet iehčanassii vázzit skuvlii, dan ferte váhnen árvvoštallat skuvlageainnu ja máná rávisvuođa ektui.
