Riikahárjeheaddji Lotta Andersson oaivvilda Signe Marie Fidje Store lea buori vuoimmis go galgá heaibut Olympiagilvvuin Rios ihttin.
Riikahárjeheaddji Lotta Andersson oaivvilda Signe Marie Fidje Store lea buori vuoimmis go galgá heaibut Olympiagilvvuin Rios ihttin.
Gaskavahkku galgá Deanu nieida Signe Marie Fidje Store (20) heaibut vuosttaš geardde Olympiagilvvuin, ja lea vuosttaš OG-nissonheaibu Norggas eret.
Buorre mearka
Hárjeheaddji jáhkká Deanu nieidda bures birget 69-kilosaš luohkás.
– Go Signe Marie lea amas earáide dán luohkás Olympiagilvvuin, de lea sus buorre vejolašvuohta. Sus ii leat nu garra hušša ja deatta iežas alde, ja son orru maid movttet ja ráfálaš. Dat lea buorre mearka, muitala son NTB:i.
Buori vuoimmis
Fidje Stores ii leat vásáhus máilmmigilvvuin ja Olympiagilvvuin senioriid dásis. Hárjeheaddji ii jáhke dan heittohin.
– Leat ollu nearvvat dákkár gilvvuin, ja erenoamážit jus leat namuhuvvon leat buoremussan ovdalgihtii. Buot sáhttá dáhpáhuvvat heaibumis, ja buot vejolašvuođat leat jus oažžu buot heivet, muitala hárjeheaddji.
– Nagoda go son muddet gealdagasdili?
– In jáhke dan šaddat váttisvuohtan. Signe diehtá ieš ahte son lea gievrras gilvaleaddji, ja diehtá ahte jus son bargá dan buoremusa maid sáhttá, de sáhttá olahit guhkás, dadjá Andersson, gii liiko dan maid oinnii Argentinas hárjehallamiin ovdal go ollejedje Rioi.
– Dan rájes go olliimet Argentinai, de lea vuoibmi badjánan, muitala Andersson.
Atná ávkki bronssas
Stig André Berge vuittii bronssa mannan sotnabeaivvi, mii attii ollu vuoimmi heaibuide. Gaskavahkku áigu Fidje Store atnit ávkin Berge bronssa.
– Lea addán ollu inspirašuvnna, ja lea váttis sániiguin čilget go leat nu ollu dovddut. Dat dovddut leat hui mávssolaččat midjiide, lohká hárjeheaddji Berge heaibuma birra. (©NTB)
