Logi nissonis bártidit čiežas vuolledábiiguin maŋŋel riegádahttima. Hárjehallan sáhttá leat ávkin váttisvuođaide, muitala fysioterapevtta ja stipendiáhtta Merete Kolberg Tennfjord.
Logi nissonis bártidit čiežas vuolledábiiguin maŋŋel riegádahttima. Hárjehallan sáhttá leat ávkin váttisvuođaide, muitala fysioterapevtta ja stipendiáhtta Merete Kolberg Tennfjord.
– Ollu nissonat dovdet bákku rupmaša oažžut buori dillái maŋŋel riegádahttima. Lea dábálaš bártidit vuolledábiiguin, ja ollugat dovdet hehttehussan sexaeallimis, dadjá Norgga falástallanallaskuvlla stipendiáhtta Merete Kolberg Tennfjord.
Hárjehallan sáhttá ávkin
Doavttergrádabarggus lea son čuvvon 300 dearvvaš, vuosttaš geardde riegádahtti nissona. Hárjehallan álggii guhtta vahkku maŋŋel riegádahttima ja bisttii njeallje mánu.
Sii hárjehalle olles rupmaša, ja erenoamážit čoarvedávttiid.
– Oinniimet ahte nissonat, geat ledje mielde hárjehallamis, eai bártidan nu bahut go earát, muitala Tennfjord.
Dárbbašit dieđuid
Tennfjord lea gávnnahan ahte dábáleamos dieđihuvvon vigit leat bákčasat vuolledábiin ja čoarvedávttiin, go sáhttá dovdot ahte cinná lea gallji, ja maiddái ahte vuolledáhpi lea goikan ja bávččas.
Son lohká ahte lea áigi hupmat dakkár bárttiid birra. Eatnit mannet dearvvašvuođaiskkademiide go leat áhpeheamet ja maŋŋel riegádahttima, ja de galggašii oažžut dieđut dan birra maid sii berrejit dahkat vai eastadit bártti.
– Sihke čalbmeeadni ja doavttir, gii čuovvu áhpehisnissona ovdal riegádahttima, ja doavttir ja dearvvašvuođadivššár gii čuovvu eatni maŋŋel, galggašedje juohkit dieđuid daid vigiid birra mat sáhttet čuožžilit, dadjá Tennfjord.
Speažžut gieđaid
Tennfjord bargá maid fysioterapevtan.
Son lea vásihan ahte ollugat ballet ahte rumaš ii šatta nu movt lei ovdal áhpehis dili.
– Dalle ferte jurddašit dan birra maid rumaš lea nagodan dahkat. Nisu lea dahkan stuora barggu man ovddas galgat gieđaid speažžut. Vuosttaš jagi lea nisu buoridanproseassas. Eatnasiid eallin šaddá fas dábálažžan ja sexaeallin maid buorrána fas, muitala Merete Kolberg Tennfjord.
