El-sihkkelat leat bivnnuheappot go goasse ovdal. Trygg Trafikk rávve dál olbmuid hárjehallat ovdal go vulget sihkkelastit dakkáriin, vai eastadit lihkohisvuođaid.
El-sihkkelat leat bivnnuheappot go goasse ovdal. Trygg Trafikk rávve dál olbmuid hárjehallat ovdal go vulget sihkkelastit dakkáriin, vai eastadit lihkohisvuođaid.
El-sihkkelat šaddet bivnnuheappot ja bivnnuheappot. Trygg Trafikkas lea čielga hástalus olbmuide. Dan almmuhit preassadieđáhusas.
– Hálddaš el-sihkkela, ovdal go dat álgá hálddašit du, lohká Ann-Kathrin Årøen Trygg Trafikkas.
Ođđasit oahppat sihkkelastit
Norggas ostet dál eambbo el-sihkkeliid go goassege ovdal. Trygg Trafikk sávvá el-sihkkeliidda buresboahtima, muhto váruhit ahte el-sihkkel ii leat dego dábálaš sihkkel.
– Lohket ahte go vuos oahppá sihkkelastit, de ii vajálduhte goasse. Muhto el-sihkkel ii leat dábálaš sihkkel, ja olmmoš ferte dego ođđasit oahppat sihkkelastit. Das leat hástalusat maid oallugat eai jurdil, lohká Årøen.
Hárjehallat ovdal go johtolagas sihkkelastá
Oallugat háliidit lášmmohallat, ja olbmot geat eai soaitte guhkes áigái sihkkelastán, ostet el-sihkkela. Trygg Trafikk rávve olbmuid, ahte eai mana johtolahkii sihkkelastit ovdal go leat geahččalan sihkkela.
– Vai it bártahuva el-sihkkeliin, de berre hárjehallat ovdal go vuolgá johtolahkii. Oallugat hirpmahuvvet man garrasit el-sihkkel čievččasta. Ovttatmanos go duolmmasta, de bidjá leahtu. Dat sáhttá roahtá vuolgit, ja dat sáhttá dagahit lihkohisvuođa, lohká Årøen.
Golbma muittuhusa
El-sihkkelastimis ferte muitit golbma diŋgga, goahcat, sihkkela deattu ja leahtu. El-sihkkel sáhttá oažžut leahtu, 25 km/d. El-sihkkel lea maid olu losit go dábálaš sihkkel, badjelaš 20 kilo.
– Lea hui dehálaš váruhit leahtu. Olu lihkuhisvuođat dáhpáhuvvet go lea beare leahttu mohkiin dahje luoddaearuin. Olu lihkohisvuođat gevvet maid go olmmoš spiehkasta luottas. Berre hárjehallat goahcama ja movt bisseha sihkkela. El-sihkkelis leat seammalágan goazanat go dábálaš sihkkelis, muhto go el-sihkkel lea losit, de ii goazas liikká bures. Adno eambbo energiija bissehit sihkkela, ja danne ferte plánet bures, loahpaha Årøen.
