Bearjadaga rájes lea 24 olbmos duođastuvvon korona Hámmerfeasttas, dieđiha gieldda sátnejođiheaddji.
Oktiibuot lea dál 283 ássis duođaštuvvon korona gielddas. Dan dieđihii gieldda sátnejođiheaddji Marianne Sivertsen Næss lávvordaga.
– 264 olbmo leat buohccit justa dál. 15 olbmo ges leat beassan eret erremis, dajai Sivertsen Næss iFinnmark aviisii lávvordaga.
Hámmerfeastta 11.000 ássis leat dál 2500 olbmo erremis. Gielddadoavttir ja Álbmotdervvašvuođainstituhtta leat dál evttohan guhkidit njoammuneastadandoaibmabijuid geassemánu 8. beaivái.
– Mii leat ovdal dorjon ja čuovvulan buot gielddadoaktára ja Álbmotdervvašvuođainstituhta evttohusaid, dajai Marianne Sivertsen Næss NTB:i.
Politiijat erremis
NRK čállá ahte Hámmerfeastta politiijavehkii maid lea njommon koronadávda.
– Mis lea unnán njoammun dieđihuvvon min bargoveagas, dadjá politiijameasttir Finnmarkkus Trond Eirik Nilsen NRK:i. Dilli ii leat váikkuhan politiijaid bargodillái.
Hámmerfeasttas leat gidden buot gávppiid, hárjehallan- ja vuojadanbáikkiid, ja ássit lea ávžžuhuvvon bissut ruovttus eastadan dihte njoammuma.
Maŋemus jándora lea 249 olbmos duođaštuvvon koronadávda Norggas. Lávvordaga ledje 81 olbmo divššus buohcceviesuin koronadávddain. Oktiibuot leat 783 olbmo jápmán koronadávdii Norggas.
(©NTB)
