Mannan vahkkoloahpa ledje Ordkalotten nammasaš internationála girjemeassut Romssas. Doppe lea sámegirječálli Saia Stueng lohkan iežas girjjis, «Hamburgerprinseassa», muhto dárogillii.
Fargga almmuhuvvo ge girjji dárogielveršuvdna.
– Mu eatnigiella lea sámegiella ja mun lean čállán dan girjji sámegillii, nu ahte lei hui earenoamáš lohkat dan dárogillii.
Sámi humor
– Mun lean lohkan iežan girjji dárogillii Romssa joatkkaskuvlaohppiide Ordkalotten girjemeassuin. Dat lea mannan hui bures. Dál besset dárogielagat oahppat sámeservodaga birra ja čalmmustahttit áššiid, nugo veahkaválddálašvuođa, seksuála veahkaválddálašvuođa ja jugešvuođa, ja maid čalmmustahttit garravuođa ja sámi humora.
– Muhto in dieđe doaibmá go sámi humor dárogillii, soaitá šaddat hui duođalaš girji dárogillii.
«Hamburgerprinseassa» dárogillii almmuhuvvo ovdal juovllaid.
