Isak Eliot háliidivččii čiŋadit sápmelažžan, go galgá ovddastit sámi giellakampánjja. Sámi Musihkkafestivála buvttadeaddji ohcá dál gáktegoarruid geat sáhtáše čiŋadit supernástti.
Isac Eliota manager čállá SMS-dieđu bokte ahte superenásti háliidivččii leat dego sápmelaš go lávke lávddi ala Guovdageainnus. Son čállá dat orru hui vuogas go Isac Elliot maid galgá ovddastit sámi giellakampánjja iežas konsearttas.
– Mii giitit go dii lehpet geahččalan váldit oktavuođa Isac Eliotiin. Dađi bahábut son ii astta mediain dál hupmat, muhto son dadjá ahte lea hui somá boahtit Guovdageidnui gos maid leat ollu sápmelaččat. Konseartta oktavuođas háliidivččii Isac Elliot maid leahkit dego sápmelaš ja coggat gávtti. Mii livččiimet dál ozus sutnje gávtti, jus diehtibehtet gos dakkára gávdná, de vástidehket áinnas dán SMS, čállá Isac Elliota manager SMS bokte Ávvirii.
Nanne sihkarvuođa
Sámi Musihkkafestivála buvttadeaddji Nils Johan Vars gal atná hui stuora gudnin go superenásti háliida gávtti coggat ja lea dál gávtti ozus Isac Elliotii.
– Munnje gal ovttatmano bođii jurdda ahte supernástti áigumuša gal sáhtášii veháš čatnat oktii sihkarvuođadoaimmain mat mis leat konseartta oktavuođas. Danne mii áigut fállat bileahtaid sidjiide geat sáhttet háhkat gávtti, mii heive Isac Elliotii. Mii leat jurddašan addit logi bileahta váhnemiidda, go de leat sii seammás mánáid mielde konsearttas, ja dat nanne sihkarvuođa, muitala son.
Ohcá gáktegoarruid
Vars ii loga diehtit makkár guovllu gákti heivešii Isac Elliotii, nu ahte ávžžuha miehtá Sámi gáktegoarruid váldit suinna oktavuođa.
– Livččii vuogas jus Isac Ellotii livččii válljenvárri, go eat dieđe guđe guovllu gáktái liiko buoremusat. Su sturrodat lea 14-jahkásaš bártnáža gákti, sullii 160 cm, mas dieđusge maid lea boagán ja liidni, lohká son.
FUOMÁŠ!! Gákteveahkit leat olámuttos telefonnummaris 400 37 305 dahje telefonnummaris 980 17 280
Dát ášši lei cuoŋománu 1. beaivvi leaika.
