-Almmuhus-
OĐĐASATHáliidit sámi namaid ekstremadálkkiide

Háliidit sámi namaid ekstremadálkkiide

-

-

Meteorologalaš Instituhtta bivdá olbmuid sáddet sidjiide nammaevttohusaid dálkkiide, go dál ávvudit 150 jagi, de áigot ođasmahttit dálkenammalisttu.

Ekstremadálkkit mat duos dás ain bohtet Norgii lávejit oažžut namaid maid Meteorologalaš Instituhtta (MI) bidjá. Dálkkiid namat leat Norgga dáččanamat, ja eai leat vel leamaš sámi namat dan listtus.

Dál lea buohkain vejolašvuohta buktit ođđa nammaevttohusaid, ja soitet sámi namat ihtit evttohussan maid MI ferte bidjat sin listui.

 

Buorre vejolašvuohta evttohit

– Dál livččii hirbmat buorre vejolašvuohta sáddet midjiide sámi namaid dálkenammalistui, go mii háliidit namaid mat geavahuvvojit Norggas, muitala Meteorologalaš Instituhta dieđihandirektevra Bård Fjukstad Ávvirii.

 

Olleme listtu lohppii

Badjel 20 jagi lea MI addán namaid ekstremadálkkiide Norggas. Maŋemus dálki mii oaččui nama «Tor» lei moadde vahkku dás ovdal, ja lei vuosttaš ekstremadálki dán jagi. MI lea bidjan nama 62 ekstremadálkái Norggas 1995 rájes.

Dál leat olleme nammalisttu lohppii, ja dárbbašit olbmuin veahki gávdnat ođđa namaid, čállá Meteorologalaš Instituhtta sin neahttasiiddus.

 

Leat máŋga eavttut makkár nama sáhttet bidjat listui.

– Namat fertejit leat oanehis namat ja álkit dadjat. Galgá dušše okta namma leat, eai ge duppalnamat, lasiha Bård Fjukstad.

Eai ábut bustávat mat dušše Norggas ja Sámis geavahuvvojit, muhto baicce internašunála bustávat. Æ,ø,å,á,č,đ,ŋ,ŧ,š,ž leat bustávat mat eai dohkkehuvvo, ja eai ábut álgit q,w,x,z bustávain. Gonagaslaš namat eai geavahuvvo, eai ge hui dovddus olbmuid namat.

 

Besset go oaidnit gárvves nammalisttu?

Namat listtus eai leat almmolaččat dan dihte go eai galgga beassat spekuleret dahje boastut ipmirdit ovdagihtii. Gárvves nammalistu lea čiegus dassážii go dieđihuvvo ekstremadálki. Nieidda ja bártni namat leat vurrolagaid, čállá MI neahttasiiddus.

 

Manne namat dálkkis?

Galgá álo leat áibbas sihkar makkár dálkkis lea sáhka. Go ekstremadálkkis lea namma, de geahpida gulahallama meteorologaid, eiseválddiid ja almmolašvuođa gaskkas, sihke ovdal, dan botta go lea ja maŋŋel ekstremadálkki.

 

Deaddel dákko jus áiggut evttohit nama.

-Almmuhus-