Gáivuona giellaguovddáš galggašii šaddat Gáivuona giellasiidan. – Siida namma váikkuhivččii eanet olbmuid dovdduide ja attášii eanet oktavuođa álbmogiid, ákkastallá giellaguovddáš ohcamušas suohkanii.
Gáivuona giellaguovddáš galggašii šaddat Gáivuona giellasiidan. – Siida namma váikkuhivččii eanet olbmuid dovdduide ja attášii eanet oktavuođa álbmogiid, ákkastallá giellaguovddáš ohcamušas suohkanii.
Gáivuona giellaguovddáš lea ohcan rievdadit nama Gáivuona giellasiidan.
– Guovddáš ii leat oahpes namma gáivuotnalaččaide. Mii leat iskan maid olbmot háliidit, ja sin mielas lea giellasiida vuohkkaset namma. Siida lea ruoktu Gáivuona suopmanis ja das lea maid árbevirolaš mearkkašupmi boazodoalus. Giellasiida váikkuhivččii eanet olbmuid dovdduide, dadjá Gáivuona giellaguovddáža jođiheaddji Per-Johannes Marainen.
Buoret oktavuođa álbmogii
Ákkastallamis čállá Gáivuona giellaguovddáš ahte siida sátni lea dábálaš sátni sin guovllus ja ahte olbmuin leat buorit dovddut čatnon sátnái.
Sii dáhtot maid árvvusatnit báikkálaččaid giellageavaheami namas.
– Giellaguovddážis háliidat eanet oktavuođa olbmuiguin, ja dá lea okta vuohki rahpat uvssa. Mii leat maid boahtte jagi bargagoahtimin gulaskuddat maid olbmot háliidit, mii galgat álbmoga bálvalit gielladilálašvuođain, lohká Marainen.
Logogilvu
Jus Gáivuona giellaguovddáš lonuha nama, de lea maid dáhtu lágidit logogilvvu.
Son guhte árvala buoremus logo vuoitá 7000 ruvnnu.
– Áigumuš lea lágidit gilvvu. Logo galgá čalmmustahttit min barggu. Min doibmii gullá eanet gullot ja oidnot, čilge Marainen.
Ráđđeolmmái doarju
Gáivuona ráđđeolmmái lea jo geahčadan giellaguovddáža ohcamuša rievdadit nama, ja son árvala politihkkariid doarjut sihke nammarievdadusa ja logogilvvu.
Gáivuona giellaguovddáža jođiheaddji Per-Johannes Marainen doaivu politihkkáriid maid doarjut sin.
– Mun doaivvun ahte sámepolitihkalaš lávdegoddi doarju árvalusa. Nammarievdadeapmi válddášii vuhtii olbmuid oaiviliid. Sin mielas lea guovddáš namma hui amas. Buohkat geain lean hupman oaivvildit ahte siida livččii vuohkkasit, dadjá son.
Ii leat vel geahčadan ášši
Duorastaga meannuda Gáivuona sámepolitihkalašlávdegoddi giellaguovddáža ohcamuša rievdadit nama Gáivuona giellaguovddážis Gáivuona giellasiidii.
Sámepolitihkalaš lávdegotti doaibmi jođiheaddji, Reidar Breivik ii leat vel geahččan ohcamuša go Ávvir čuojaha sutnje ja danin ii háliit vel searvat jearahallamii dán birra.
