Duopmostuolohálddahus háliida Hålogalándda lágamánnerievttis bissovaš riektesaji Finnmárkui.
Duopmostuolohálddahusa stivra áigu boahtte čoahkkimis, mii lea geassemánus, meannudit Hålogalándda lágamánnerievtti riektesaji ásaheami Finnmárkui. Sii evttohit ásahit riektesaji Áltái.
Evttohus boahtá das go Alimusrievtti guoddaluslávdegoddi celkkii muhtin mearrádusas ahte lea heitot go Hålogalándda lágamánnerievttis ii leat bissovaš riektesadji Finnmárkkus. Guoddaluslávdegoddi cuiggodii maid dan ahte čuožžilit váttisvuođat go mielduopmárat Finnmárkkus lihccot, go lágamánnerievttis ii leat fásta riektesadji dahje heivehuvvon lanjat.
Cealkámuš Alimusrievtti guoddaluslávdegottis bođii maŋŋel go meannudedje ášši Hålogalándda lágamánnerievttis mas sámi dievdu lei áššáskuhtton go lei áitán bombet Kárášjoga ráđđeviesu.
Guoddalanášši lei Romssas, muhto dievdu lei álggos gáibidan ahte guoddalanášši galggai dollot Finnmárkkus.
(©NTB)
