Čiežas logi olbmos háliidivčče sierra promillarájá elčiekčansihkkelgeavaheapmái. Trygg Trafikk ja Tryg Forsikring muitalit ahte jus vuojahalat elčiekčansihkkelii ja roasmmehuvat bahut, de ii gávdno dáhkádus mii sihkkarasttášii buhtadusa dutnje.
Analiisainstituhta YouGov lea čađahan eaktodáhtolaš searvi Trygg Trafikk ja dáhkádusfitnodat Tryg Forsikring ovddas riikaviidosaš iskosa 29.04.-03.05.21 áigodagas ja jearahan oktiibuot 1008 olbmo geat ledje badjel 18 jagi.
– Mii háliidivččiimet sierra promillarájá elčiekčansihkkeliid geavaheapmái ja livčče ávkin erenoamážit politiijai mii galgá dan bearráigeahččat, lohká Trygg Trafikk (TT) seniorneavvu Harald Heieraas.
Iskan čájeha 60 proseantta lohket sii háliidit promillarájá elčiekčansihkkelii, 19 proseantta eai háliit dan.
– Dálá njuolggadusaid ektui fertet ieš árvvoštallat sáhtát go vuodjit. Ii galggašii juhkan olbmuide addit dan árvvoštallanvejolašvuođa. Dás dárbbašat čielga promillarájá. Lunddolaš rádjá lea 0,2 promillarádjá, seamma go biillas, lohká Heieraas.
Háliidit mohtorvuoján čilgehusa
Harald Heieraas muitala sii háliidit rievdadit elčiekčansihkkela dálá čilgehusa mohtorvuoján čilgehussii.
– Dalle lea álkit promillarájá ásahit ja ásahit jealbmagáibádusa. Lea dárbu dan dahkat go oaidnit man jođánit sáhttá bávččagahttit oaivvi duođalaččat go bártida ja man olusat bártidit juhkanvuođas, lohká Heieraas.
Háliidit bákkolaš geatnegasdáhkádusa
Tryg Forsikring gulahallanneavvu Torbjørn Brandeggen čujuha Osloi gos fertejedje gieldit elčiekčansihkkelláigoheami ihkku go ledje nu olu lihkohisvuođat juhkanvuođa vuodjima geažil.
– Lihkohisvuođalohku lea mealgat lassánan, erenoamážit go juhkanvuođas vudjet. Seammás háliidivččiimet geatnegahttit fitnodagaid mat láiguhit olbmuide elčiekčansikkeliid. Jus dál vuojahalat elčiekčansihkkelii nu ahte roasmmehuvat bahuid eallenahkái, de ii gávdno dáhkádus mii sihkkarastá dutnje buhtadusa, lohká Brandeggen.
