Guovdageainnu gurutbellodat áigu áŋgiruššat ožžodit gáiddusoahpu politiijaide Guovdageidnui.
Guovdageainnu gurutbellodat áigu áŋgiruššat ožžodit gáiddusoahpu politiijaide Guovdageidnui.
– Mii leat juo ságastallan Sámediggepresideanttain ja hástán Sámedikki veahkkin, ahte mii fertet dál áŋgiruššat dasa ahte Sámi allaskuvllas galggašii leat vejolašvuohta váldit gáiddusoahpu politiijaskuvllas, ja son lei áibbas ovttaoaivilis. Dat sáhtášii leat čoavddus dasa go Guovdageainnus váilot politiijat ja soaitá maid dagahit ahte eanet sámegielagat váldet politiijaoahpu, dadjá Guovdageainnu gurutbellodaga sátnejođiheaddjievttohus Anton Dahl.
Geahččalit váikkuhit
Gurutbellodaga sátnejođiheaddjievttohas ii hálit vel almmuhit sin bellodatprográmma suohkanválgii, muhto muitala ahte oahppofálaldagat sihke joatkkaskuvllas ja Sámi allaskuvllas goit lea juoga maid sii áigot geahččalit váikkuhit jus sii besset posišuvdnii dán čavčča.
– Suohkan dieđus ii sáhte mearridit makkár oahpu stáda skuvllat galget fállat, muhto suohkan sáhttá geahččalit váikkuhit Sámi allaskuvlla ja Sámi joatkka ja boazodoalloskuvlla. Go geat bat earát dihtet mii Guovdageainnu servodagas váilu go suohkana politihkkárat, geat fas ovddastit suohkana ássiid, ja Politiija oahppu lea goit okta mii lea dárbbašlaš min servodagas. Guovdageainnu nuorat leat maid munnje muitalan ahte dáppe váilu buohccidivššár ja inšenevra oahppu, muitala Anton Dahl.
Njulget ekonomiija
Vaikke Anton Dahl ii vel hálit almmuhit sin bellodatprográmma, de son aŋkke muitala veháš sisdoalu.
– Skuvla gal lea hui dehálaš Gurutbellodaga politihkas. Vuosttažettiin gal lea mis beare heittot skuvlavisti vuođđoskuvllas. Dat ii leat dohkálaš beare dávjá mánáid sáddet ruoktot go skuvllas lea beare čoaskkis. Mánát masset dehálaš oahpu ja váhnemat maid šaddet jávkat bargguin, nu ahte dainna goit áigu gurutbellodat bargat, dadjá Dahl. Muhto vuosttaš bargu jus gurutbellodat beassá posišuvdnii, lea njulget suohkana ekonomiija, ja dan sii oaivvildit nagodit.
– Go mun šadden sátnejođiheaddjin 1992, lei Guovdageainnu suohkanis seamma dilli go dál lea, ja dalle goit njuolggai dilli. Nu ahte dat ii leat veadjemeahttun, muitala Guovdageainnu gurutbellodaga sátnejođiheaddjievttohas, Anton Dahl.
Váillahan dialoga
Sámi allaskuvlla rektor Gunnvor Guttorm rámida Guovdageainnu Gurutbellodaga go lea fuobmán ahte suohkan berre veahkkin váikkuhit skuvlafálaldagaide. –
Mii gal leat váillahan dialoga Guovdageainnu suohkaniin oahppofálaldagaid bealis go Sámi allaskuvla lea bákkolaš bálvalit sámi servvodaga dárbbuid. Jus čájeha ahte servodagas lea dárbu ahte mii fállat Politiijaoahpu Sámi allaskuvllas, de dat lea hui miellagiddevaš midjiide. Mii áinnas searvat ságastallamiidda movt mii dákkár oahpu praktihkalaččat sáhttit fállat, ja mis lea sihke giellamáhttu, kulturmáhttu, sámi servodatmáhttu ja juristtat min skuvllas, dadjá Sámi allaskuvlla rektor Gunnvor Guttorm.
(Ášši lea almmuhuvvon báberaviissas 05.08.15)
