FeFo dahká ruoššaluosa raporterema álkibun sidjiide geat mearas bivdet stákkuin dahje giehtasáimmaiguin. Raporterejeddjiid gaskkas vuorbáduvvojit buori oaggunneavvut vuoitun.
– Ruoššaluosa leavvama geažil leat ollugat bivdigoahtán ruoššaluosaid mearragáttiin ja fatnasiin. Eai ge leat unnán ruoššaluosat mat goddojit dáppe Finnmárkkus. Dán bivddus ii gávdno oppalaš govva ja FeFo háliida veahkkin buoridit diehtovuođu, čállá FeFo preassadieđáhusas.
Sálašraporteren mearrabivddus maiddái
FeFo čilge ahte dál bohtet eanaš ruoššaluosa raporttat sis, geat bivdet firpmiiguin.
– Ruoššaluosa leavvan buktá ođđa hástalusaid hálddašeami dáfus, ja dasto dárbbašat ođđa ja eará dieđuid. Mis váilu obbalaš govva ruoššaluosa bivddus. FeFo lea dahkan vejolažžan raporteret goddon ruoššaluosa oaggunkoartta bokte. Dat addá ávkkálaš dieđuid hálddašeapmái ja dahká vejolažžan árvvoštallat mo ruoššaluossa váikkuha min iežamet luossa-, guvžá- ja valasnalliide guhkit áiggi badjel, čállá FeFo. Álkit raporteren ja eambbo dieđut
Finnmárkku ássit bivdet nuvttá Finnmárkkuopmodaga ortnega bokte. Finnmárkulaččat hásttuhuvvojit liikká háhkat nuvttágoartta. Ulbmil nuvttágoartaortnegiin lea fidnet eambbo dieđuid das mo báikkiolbmot ávkkástallet sáivaguollevalljodagain.
– Das go mis lea juo doaimmas dakkár raporterenvuogádat, ja sierra raporterenáppa, de háliidat das ávkkástallat vai šaddá álkit raporteret ruoššaluosa. Mii hásttuhit finnmárkulaččaid geat bivdet ruoššaluosa mearas ráhkadit geavaheaddji www.natureit.no siiddus, luvvet nuvttákoartta ja raporteret goddon ruoššaluosa. Bealisteamet áigut fievrredit dáid loguid viidáseappot Birasdirektoráhttii, vai sis šaddá buoret govva das, man olu ruoššaluossa goddojuvvo mearas dáppe Finnmárkkus, čállá FeFo. Go leat ráhkadan geavaheaddji neahttasiiddus, de vieččat NatureIT áppa Play/App store bokte. Geavahat seammá sisaloggendieđuid áppas ja neahttasiiddus, ja áppain lea hui álki raporteret FeFo muittuha vel ahte go luossabivdu nohká, de FeFo vuorbáda vuitiid sin gaskkas geat leat raporteren sállaša. Vuoitun leat oaggunneavvut maid árvu oktiibuot lea 20 000 ruvnno ovddas. Jus orut Finnmárkkus ja leat raporteret sállaša dán jagi guollebivddus, de leat don ge mielde vuorbádeamis.
