-Almmuhus-
OĐĐASATHáliidit jođihišgoahtit eanandoallopolitihkalaš ossodaga boazodoallojuhkosa

Háliidit jođihišgoahtit eanandoallopolitihkalaš ossodaga boazodoallojuhkosa

-

-

Eanadoallo- ja biebmodepartemeanta lea ohcame ossodatdirektevrra eanandoallopolitihkalaš ossodahkii, boazodoallojuhkosii. 

Vihtta dievdoolbmo ja golbma nissonolbmo ohce ossodatdirektevravirgái ovdal go ohcanáigemearri nogai (geahča namaid vuolemusas áššis). Sii háliidit bargagoahtit virggis mas Marit Jane Myklevold luohpá. 

Eanandoallopolitihkalaš ossodagas lea fágaovddasvástádus eanandoallošiehtadussii ja boazodoallošiehtadussii ja jahkásaš šiehtadallamiid ektui daidda šiehtadusaide.

Dasa lassin lea ossodat maid mielde hábmeme Norgga eanandoallopolitihka.

Ossodagas lea maid ovddasvástádus internationála šiehtadallamiidda, ealáhusovdáneapmái ja birasgažaldagaide mat gusket eanandollui.

 

Sámegiella ovdamunnin

Eanandoallodepartemeanta ohcá olbmo virgái gii lea čielga ja čeahpes jođiheaddji.

Sus ferte leat beroštupmi eanandoallopolitihkkii obbalaččat ja boazodoallopolitihkkii earenoamážit. 

Virgealmmuhusas čálii departemeanta ahte lea dehálaš ahte ohcci dovdá boazodoalu ja ahte lea bargovásáhus boazodoallosuorggis. Viidásit lea maid ovdamunni jus ohcci dovdá sámi kultuvrra ja hálddaša sámegiela

 

Áidna sápmelaš


OHCCI: Liv Berit Hætta lea ohcan virgái. Vuorkágovva: Marit Elin Kemi

Eanandoallopolitihkalaš ossodagas lea maid ovddasvástádus Eanandoallodirektoráhta boazodoalloossodahkii, Álttás, ja son gii dál bargá direktevran Eanandoallodirektoráhta boazodoalloossodagas, Liv Berit Hætta (Mázes eret), lea okta ohcciin.

Son lea 2017 rájes bargan Eanandoallodirektoráhta boazodoalloossodaga direktevran.

Su mielas orru departemeantta bargu hui gelddolaš ja lea danne ohcan virggi. 

– Dat lea seamma fága go maid dál barggan, muhto virgi lea badjelis ja lea eambbo politihkalaš. Jus oaččun virggi, de šaddá ain ollu ovttasbargu direktoráhtain ja de livččii ulbmil joatkit dainna buriin ovttasbargguin mii mis lea direktoráhta ja departemeantta gaskkas, dadjá Liv Berit Hætta ja joatká:

– Dát dieđusge lea proseassa ja mun háliidan čorgadis proseassa. Danne in hálit vuos dadjat nu ollu virgeohcama birra. Munnje lea dehálaš ahte dat dahkko nu čorgadit go vejolaš, ja de in hálit dadjat nu ollu eambbo go ahte lean ohcan virgái. 

 

Ii kommentere


II KOMMENTERE: Morten Floor. Vuorkágovva: Alice Balto

Morten Floor, gii dál lea eanandoallopolitihkalaš ossodaga fágadirektevra, boazodoallojuhkosis, lea maid okta ohcciin.

Son ii hálit kommenteret ohcama ii ge muitalit manne son lea ohcan virgái. 

– Sáhtán duođaštit ahte mun lean ohcan virggi, eará in hálit kommenteret dán áššis, dadjá son. 

 

Ohccit leat

Thorbjørn Gaarder (63), Chief credit officer, Oslo

Trine Reitan (50), juridihkalaš seniorráđđeaddi, Oslo

Morten Floor (49), boazodoallojuhkosa fágadirektevra, Oslo

Åge Walle (63), advokáhtta, Oslo

Punya Raja (26), Ii leat bargu, Oslo

Charles Hansen (53), doaimmahatjođiheaddji, Fredrikstad

Liv Berit Hætta (46), Eanandoallodirektoráhta boazodoalloossodaga direktevra, Áltá

Peter Ericson (55), Entreprenevra, Härnösand

-Almmuhus-