Ovddádusbellodaga johtolatpolitihkkárat Stuoradikkis áigot disdaga bivdit ráđđehusa bidjat johtui barggu mii duohtan dahká Davvi-Norgga ruovdemáđija.
Leaba Ovddádusbellodaga stuorradiggeáirras Per-Willy Amundsen ja Sosialisttalaš Gurutbellodaga Torgeir Knag Fylkesnes geat leaba buktán ovddastusevttohasa, ja dál lea Amundsen ožžon olles Ovddádusbellodaga stuoradiggejoavkku doarjut evttohusa.
– Lean hui ilus dainna go Ovddádusbellodat váldá duođalažžan Davvi-Norgga, ja go oidnet man dehálaš dárbu lea infrastruktuvrii. Dát láhčá buoret dili ekonomalaš lassáneapmái ja čatná olles regiovnna buorebut oktii – dan regiovnna mii šaddá vel deháleabbon boahtteáiggis, dadjá stuorradiggeáirras Per–Willy Amundsen preassadieđáhusas.
Davvi-Norgga ruovdemáđija plána lea guhkidit ruovdemáđija Fuoskkus Romsii, ja Hársttaide.
Ovddádusbellodat háliida dál ahte Davvi-Norgga ruovdemáđidja šaddá prošeaktan boahtte Nationála fievrrádusplánas.
– Dát sáhttá maiddái addit ođđa internationála fievrridanortnega, lohká stuorradiggeáirras Morten Stordalen ja čujuha earret eará ruovdemáđidjii mii manná Ruoŧas Áhkánjárgii ja maid sáhtášii čatnat Davvi-Norgga ruovdemáđidjii.