Geassemánu 8. beaivvi mearridii Sámediggi ahte sámediggeáirasat, geat sámástit, galget oažžut lasi sárdnunáiggi dievasčoahkkimiin.
Geassemánu 8. beaivvi mearridii Sámediggi ahte sámediggeáirasat, geat sámástit, galget oažžut lasi sárdnunáiggi dievasčoahkkimiin.
Norgga Sámiid Riikkasearvi, Árja, Dáloniid listu ja Johttisámiid listu dorjo árvalusa mii láhčá dili eanet sámegielageavaheapmái Sámedikki sárdnestuolus, čállet sii preassadieđáhusas.
– Mii leat hui illosat go Sámedikki eanetlohku doarjjui dán árvalusa ja dainna lágiin lokten sámegielaid moadde lávkki ain ovddos guvlui. Sámediggi galgá leat njunnošis sámegielaid seailluheamis ja ovdánahttimis, ja mii sávvat ahte dát mearrádus movttiidahttá ja hástala eanebuid sámástit Sámedikkis.
Ádjána guhkit sámegillii
Digaštaladettiin áššis «Sámediggi sámegiela geavaheami ofelažžan» de ákkastallojuvvui ahte dávjá ádjána guhkit áirasiidda ovdanbuktit sáhkavuoru sámegillii.
– Máŋga áirasa leat guovttegielagat, ja máŋgasiin lea sámegiella nubbingiellan. Dávjá geavvá nu ahte geavahuvvo eanet áigi bidjat ášši ovdan sámegillii. Liigesárdnunáigi addá vejolašvuođa áirasiidda geavahit eanet sámegiela sárdnestuolus, ja iešalddis movttiidahttá politihkkáriid geavahit gielaset, lohket bellodagat preassadieđáhusas.
– Áirasiid vuođđu digaštallamii leat áššebáhpárat. Mearrádus maid dáhttu Sámedikki jorgalit áššebáhpáriid buot sámegielaide.
