Sámediggeáirasat Mathis Nilsen Eira ja Jovna Vars Smuk NSR vuorjašuvvaba Tine meieriija plánejuvvon meieriijaid heaittihemiid geažil Finnmárkkus.
– Guovddušteapmi meieriijain ja njuovahagain čuohcá Finnmárkku boanddaide. Midjiide lea dehálaš ahte mii áimmahuššat min vuođđoealáhusbargosajiid, ja mielkki ja bierggu Finnmárkku boanddain galgá joatkit reidemis Finnmárkkus, dadjá Mathis Nilsen Eira NSR preassadieđáhusas.
Báikkálaš lea buoret
Eira čujuha man mearkkašahtti báikkálaš ja regionálalaš meieriijat lea boanddaide ja geavaheddjiide Finnmárkkus.
– Mielki oažžu issoras guhkes fievrridangeainnu, jus dat galgá Bajit-Báhčaveajis Áltái dahje Storsteinnesii. Mii oaivvildit báikkálaš njuovvan ja mielkki reiden lea buorren boanddaide, geavaheddjiide, klimái ja biebmosihkarvuhtii, dadjá Eira.
Manahit bargosajiid
Jovna Vars Smuk, gii lea Nuortaguovllu Sámediggeáirras, čujuha dan dehálašvuođa go manahit bargosajiid go Tine áigu ođđa struktuvrra.
– Dál leat meieriijain Deanus ja Álttás oktiibuot 34 bargosaji, seammás leat sii geat addet fálaldagaid mat leat dárbbašlaččat boanddaide olles Finnmárkkus. Dát guovllubargosajit mearkkašit olu Detnui, dadjá Jovna Vars Smuk, NSR sámediggeáirras Nuortaguovllus.
Gulahallama Tine meieriijain
Sámediggeáirasat sávvaba gulahallama gaskal Tine ja Sámedikki doalahit ja ovdánahttit čovdosiid báikkálaš ja regionála meieriijaide, muhto čujuheaba ahte NSR boahtá vuosttildit eiseválddiid eanadoalusoahpamuša.
– Midjiide lea hui dehálaš ahte mis leat ain meieriijat sihke Deanus ja Álttás mat váldet vuostá mielkki boanddain Finnmárkkus. Danne boahtá NSR cealkit dán jagáš eanodoalusoahpámusaš dan dárbun ahte lea desentraliseret meieriija- ja njuovahatstruktuvra, loahpaha Vars Smuk.
Sávvá gulahallama Sámedikkiin
Tine meieriija gulahallanráđđeaddi Olav Håland lohká Tinii lea dehálaš ráhkadit buoremus mearrádusvuođu ja ahte buot bealit bohtet ovdan ovdal go dahket mearrádusa maid dahket meieriijaiguin Finnmárkkus.
– Dan sivas mii sávvat ge gulahallama Sámedikkiin. Plána mielde de álgit mii bargguin čielggadit meieriastruktuvrra Finnmárkkus juste maŋŋelaš geasi ja vuordit ahte čielggadanbargu ádjána 10-12 vahku. Mis lea juo guokte oktavuođaolbmo geat leaba gergosat gulahallat Sámedikkiin, dadjá Håland Ávvirii.
