-Almmuhus-
OĐĐASATHáliidit Finnmárkku borramuša máistit

Háliidit Finnmárkku borramuša máistit

-

-

Eanemus norgalaččat háliidit Finnmárkku báikkálaš borramuša máistit. – Álbmot lea beroštišgoahtán eambbo Norgga báikkálaš borramušas, lohká Stiftelsen Norsk Mat hálddahuslaš direktevra Nina Sundqvist.

– Mii leat jearran olbmuid gos sii háliidivčče mátkkoštit vai besset borrat dan eanemus mihtilmas báikkálaš borramuša jagi 2015:s, jagi 2019:s ja dál jagi 2021:s. Mii vuohtit olbmot leat beroštišgoahtán eanet báikkálaš borramušas ja guovlluin. Muhto Finnmárku vuoitá juohke háve, lohká Stiftelsen Norsk Mat hálddahuslaš direktevra Nina Sundqvist.

Go buohtastahtte ovddeš dieđuid loguid, de leat sii jagi 2021:s sirren Finnmárkku ja Tromssa goabbat guovlun. Bohtosat čájehit ahte eanemusat háliidit Finnmárkku galledit, vásihit guovllu erenomáš báikkálaš borramuša. Jagi 2015:s háliidedje 11 proseantta Finnmárkkus fitnat, jagi 2019:s vástidedje 14 proseantta sii háliidit Finnmárkui ja jagi 2021:s vástidedje 16 proseantta sii háliidit davás Finnmárkui. Lea Norstat ja Mediacom Insight mat leat čađahan jearahaniskosa Stiftelsen Norsk Mat ovddas. 

Sundqvist čilge ahte olbmuid beroštumis lea Finnmárku buoremus ja eanemus geasuheaddji báikkálaš borramušguovlu. Son lohká dát lea buorre ođas guovllu borramušbuvttadeaddjiide ja mátkeealáhussii. Olbmot namuhit buhtes luonddu ja bohccobiergu, luopmána, gonagasreabbá ja Atlántta luosa man dáhttut máistit. 

-Almmuhus-