Sørlándda mátkeeallinealáhus háliida viežžat Davvi-Norgga turisttaid chartergirdiin máttás beaivvážii ja geassái.
– Girdi, mii dábálaččat manná Romssas Mallorcai, bisána dán jagi Kristiansandii, dadjá Eivind Lund Fædrelandsvennenii.
Son lea prošeavtta «Syden 2020» álggaheaddji, gos Sørlánda vuvdojuvvo mátkemearrin go norgalaččat eai beasa mannat olgoriikii.
Chris Hudson Visit Tromsøs maid oaidná vejolašvuođaid.
– Chartergirdi sáhttá mannat goappaš guvlui. Mii sáhttit fállat páhkkamátkki lullin davás, nu ahte dat leat hui miellagiddevaš prošeakta goappaš beliide, dadjá son.
