Virke Reiseliv ávžžuha ráđđehusa sihkkarastit friddja gilvvohallama Norgga stuorámus turistarusttegiid lahka, nu go Davvinjárggas.
Mátkkoštansuorggi berošteaddji orgána, Virke Reiseliv, ávžžuha ráđđehusa sihkkarastit friddja gilvvohallama Norgga stuorámus turistarusttegiid lahka, nu go Davvinjárggas.
– Luonddubáikkit berrejit searvevuhtii leat gullevaččat. Virke cuiggoda go eaŋkil aktevrraide addo sierra riekti Davvinjárgga «Nordkapp-platå» badjel, lohká Virke Reiseliv Astrid Bergmål Dagens Næringslivii.
Ii doarjjo sierrarievtti
Davvinjárgga suohkanstivra galgá duorastaga mearridit ožžot go Rica ja Scandic sierra rievtti jođihit turismadoaimma Davvinjárgga davimus sajis, mii gohčoduvvo «Nordkapp-platå».
– Norgga mátkeealáhusa ovdáneamis ja friddja gilvvu ektui ii leat buorre go eaŋkil aktevra duohtavuođas šaddá eaktobuvttadeaddjin turistarusttegiid ovdáneamis nu go dás, lohká Bergmål.
– Buohkat dinejit
Scandica Norgga hoavda Svein Arild Steen-Mevold Scandicas lohká ahte sii eai leat okto dineme ruđa Davvinjárggas.
– Buot fitnodagat dinejit mat jođihit ja vuvdet mátkkiid Davvinjárgii, ležzet dal bussefitnodagat, mátkevuovdaleaddjit dahje stuorát cruisefatnasat. Buohkaide lea infrastruktuvra ávkkálaš maid Scandic fállá, lohká son.
(©NTB)
