Sámi Allaskuvla lágida boahtte geasi geassekurssa sámi musihkas ja juoigamis. Ja deaivvadeamit galget leat iešguđet báikkis ja festiválain.
– Liikot go lávlut, juoigat dahje čuojahit instrumeantta? De oza geassekursii mii lágiduvvo Riđđu Riđus ja Ijahis Ija festiválas, čállá Sámi Allaskuvla preassadieđáhusas.
Sii čállet ahte kursa addá lávlolasaide ja juoigalasaide dahje čuojaheddjiide fálaldaga teorehtalaččat, praktihkalaččat ja dáiddalaččat ovdánahttit iežaset nuohtalašmáhtu. Sámi musihkka- ja juoiganoahppu addá vejolašvuođa viiddidit ja nannet sámi musihka– ja dahje juoiganmáhtu.
Ealli árbevierru
Sámi Allaskuvlla dekána Mai Britt Utsi lea hui ilus go dál besset loktet musihka ja juoigama fágan.
– Musihkka ja juoigan leat ealli árbevierut mat movttáskahttit ja ealáskahttet olbmo, dadjá Mai Britt Utsi.
Eksámen lávddis
Deaivvadeamit lea Ohcejogas geassemánu 5-7 beaivvit, Riđđu Riđu festiválas suoidnemánu 7-9 beaivvit ja eksámen dollo Ijahis ija festiválas lávddis borgemánu 13-14 beaivvit. Ohcanáigemearri dása lea 15.4.2015. Fágaplánas čilgejit ahte sámi musihkka- ja juoiganoahppu addá vejolašvuođa viiddidit ja nannet sámi musihkka– ja juoiganmáhtu.
– Oahpus iskat lahkonit luođi jietnahárjehusaiguin ja oahpásnuvvat iešguđetlágan juoigansuopmaniidda. Mo aiddo don juoiggat ja gávnnat luođi iežat siste ja movt sáhttá ovdánahttit juoiganjiena.
Maiddái ođđamállet
Árbevirolaš juoigan ii leat šat dán áigge áidna sámemusihkkavuohki, danne kurssas hárjehallet maiddái modearna sámemusihka 70-logus dán beaivái. Das oahpásnuvvá musihkkára bargui lávddi alde ja lávddi duohken, ja maid iešalddes sámemusihkkár bargá, mo lea čuožžut gehččiid ovddas lávddi alde ja maid musihkkárin bargá ovdal go lea dán rádjai ollen.
