– Dál lea áigi mearridit sierra Finnmárkkuguolástuslága man Mearraguolástuslávdegoddi evttohii 2008:s, lohká NSR sámediggeáirras Silje Karine Muotka.
– Dál lea áigi mearridit sierra Finnmárkkuguolástuslága man Mearraguolástuslávdegoddi evttohii 2008:s, lohká NSR sámediggeáirras Silje Karine Muotka.
Norgga našunála olmmošvuoigatvuođa institušuvdna (NIM) lea Stuoradikki jahkedieđáhusas, mii dán vahkku almmuhuvvui, deattuhan ahte mearrasámiid guolástusrievtti ferte nannet.
Dán dieđiha Norgga Sámiid Riikkasearvi preassadieđáhusas.
Sierra guolástusláhka Finnmárkui
Geatnegasvuođakommišuvdna lea evttohan heaittihit gieđahallangeatnegasvuođa, fálaldatgeatnegasvuođa ja doaibmageatnegasvuođa maid kommišuvdna lohká dego guolleeriid vuolideapmin.
Viidáset evttohuvvo maid ahte vuoliduvvon earrefáktorat biddjojit stádalaš earrerádjui mii vuovdá eriid industriijaide gáttis.
Kommišuvdna evttoha ahte čuorvvasgávpeortnet galgá biddjot ealáhusfondii mii lea buorren riddoservvodagaide.
– Geatnegasvuođakommišuvnna doalaheami ektui leat ollugat geat bivdet sátnevuoru. Mun oaivvildan ahte mii galgat digaštallat eará čovdosiid maid. Oaivvildan ahte mii fertet geahčadit dan ovttajienalaš evttohusa maid áššedovdilávdegoddi dohkkehii ja Riddoguolástuslávdegoddi evttohii 2008:s. Dalle evttohuvvui sierra «Finnmárkkuguolástusláhka», lohká sámediggeáirras Silje Karine Muotka preassadieđáhusas.
Nannet dáláš rivttiid
Muotka oaivvilda ahte dál ferte árvvoštallat ásahit servvodateriid mat leat oassin áhpenuohtástaneriin maid geatnegasvuođakommišuvdna lea evttohan sirdit riddoguolástusfatnasiidda.
– Mun oaivvildan ahte mii fertet ságastallat dan stuora eari birra maid sirdit áhpenuohttunfatnasiin rittuide. Mii fertet maid sihkkarastit ahte eriid gieđahallet guovlulaččat, ja maid sáhttá láigohit earáide. Lean vuohttán ahte Finnmárkku Bargiidbellodat ovddida miellagiddevaš evttohusa dán oktavuođas, nu ahte oaivvildan ahte mii fertet dárkilit ságastallat dán birra dál, lohká Muotka.
– Mii fertet áinnas ságastallat galgá go láhka guoskat Romssa ja Nordlándda guovlluide, muhto váldočuokkis lea ahte dáláš mearrasámiid guolástusrievttit nannejuvvojit. Dát eaktuda ahte ásahuvvojit buorit ortnegat guolástusfatnasiid ruhtademiide, loahpaha Muotka.
