-Almmuhus-
VALÁŠTALLANHáliidit ahte Håvard joatkkášii

Háliidit ahte Håvard joatkkášii

-

-

Norgga ovttastusvaláštallit sávvet ahte Håvard Klemetsen joatkkašii riikkajoavkkus, guovdageaidnulaš muitala dán mánus mearridit joatká go vai heaitá go buoremusaid searvvis.

Norgga ovttastusvaláštallama riikkajoavkkus eai háliit ahte Håvard Klemetsen galgá guođđit valáštallama. Magnus Moan muitala ahte Håvard bargá jierpmálaččat ja garrasit vai olahivččii mihttuidis.

 – Son lea vuoitán máŋga njuikema vaikke dássi lea badjelis go goassege ovdal, dasa lassin čájeha sakka buori ovdáneami čuoiganláhttus. Mun hirpmástuvan go oainnán man bures birgehallá, dadjá Moan Altapostenii.

 

Sáhttá ain olahit olu

Magnus Moan oaivvilda ahte Klemetsen lea bures ovdánan čuoigamis maŋimuš jagiid go lea bargan ja hárjehallan dan nammii. Son govvida guovdageaidnulačča Norgga riikkajoavkku buoremussan máilmmicupas.

 – Sus lea ain olu ahtanuššat. Sávan sihke iežan ja riikkajoavkku olis ahte Håvard joatká, lohká son.

 

Váillahivččii

Telemárkulaš Magnus Krog faskii ovttas Klemetsenin Olympia golli joavkogilvvus diibmá, son lea ovttaoaivilis Magnus Moanin ja sávvá ahte veterána joatkkašivččii riikkajoavkkus.

 – Ledjen duođas sávvan ahte Håvard livččii vuoitit golli Falunis, dan livččii ánssášit. Klemetsen lea maŋimuš njeallje jagi ovdánan ja lea mearkkašahtti ahte birgehallá buoremusaid searvvis vaikke ii leat šat nu nuorra. Dan beaivvi go heaitá, de boahtit su váillahit riikkajoavkkus, lohká Krog.

 

Bisošii buoremusaid searvvis

Krog oaivvilda ahte Håvard Klemetsen gullá riikkajovkui ja ahte beasašii ovddastit Norgga ain máŋga jagi.

 – Lean oalle sihkkar ahte Håvard birgešii bures máilmmicupas ain olu jagiid jus mearrida joatkkit valáštallin. Son lea dehálaš riikkajovkui ja min birrasii, čilge Magnus Krog.

 


Håvard Klemetsen mearrida dán manus joatká go Norgga riikkajoavkkus vai ii. Vuorkágovva: Ovlla Gaup

Jurddašallá

Mannan áigodat leamaš buoremus guovdageaidnulačča ovttastusgilvvu karriearas, dál lea Håvard Klemetsen jurddašallamin boahtte áiggis birra.

 – Mun mearridan dán mánus joatkkán go vai in. Mun joatkkán dušše jus lea 100 proseantta mokta, in fal danin go ii galggašii eará maid homme. Jus mearridan joatkit, de galgá mus dáhtu šaddat vel buorebut. Dalle ferte sihke rumaš ja oaivi gearggus hárjehallat garrasit. Dasa lassin ferte ruovttu bihttáspeallu heivehuvvot dása, čilge Klemetsen Altaposten aviisii.

-Almmuhus-