Go sihke elrávnnji, bensiinna ja diesela haddi dávjá rievddada, de gártá geavaheddjiide váttisin diehtit man olu máksá vuodjit biillain, cealká Johtolatdepartemeanta.
– Mii háliidat dál álkidit geavaheddjiide buohtastahttit man olu máksá vuodjit elbiillain ja biillain mii geavaha bensiinna dahje diesela. Ulbmil buohtastahttimiin lea movttiidahttit eambbogiid válljet elbiilla sin boahtte biilan, dadjá johtolatministtar Jon-Ivar Nygård ráđđehusa preassadieđáhusas.
Ođđa láhkaásahus
Johtolatdepartemeanta lea mearridan ođđa láhkaásahusa boaldámuša ja elrávnnji haddebuohtastahttimis. Dat galgá čájehuvvot stuorra energiijastašuvnnain jagi 2023 rájes. Dás maid galgá boahtit ovdan man olu máksá vuodjit 100 kilomehtera persovdnabiillain mas lea elektrihkalaš mohtor, buohtastahtton persovdnabiillain mas lea bensiidna- dahje dieselmohtor.
Nationála gaskamearálaš haddi buot stašuvnnain
– Mii háliidat ahte galgá šaddat álkibun biilavuddjiide orienteret. Danne galgá haddi leat seamma buot energiijastašuvnnain, ja galgá leat nationála gaskamearálaš haddi sihke boaldámušas ja elrávnnjis. Vuosttaš vuorus galgá bensiidna-, diesel- ja elrávdnjehaddi čájehuvvot, muhto lea áigeguovdil lasihit eará boaldámušaid maŋŋelaš, ovdamearkka dihte hydrogena, dadjá Nygård preassadieđáhusas.
Láhkaásahus lea EU-ortnet. Norggas galgá Stáhta geaidnodoaimmahat hovdet energiijastašuvnnaid dieđuid.
