Háliideaba rievdadit dan movt suohkan jurddaša nuoraid doaimmaid ektui

-

Ássiidiskadeamis boahtá ovdan ahte leat olu nuorat geat áigot orrut Guovdageainnus boahtteáiggis, muhto leat maid oallugat geat eai áiggo dahje eai dieđe áigot go. Aitto virgáduvvon nuoraidkoordináhtoriin leat jurdagat mo oažžut nuoraid loaktit. 

Sis geat leat 19 jagi boarrásat dahje nuorabut leat birrasii 26 proseantta vástidan «juo» ja 26 proseantta «oalle vissásit juo». Sis gaskal 20 ja 29 jagi boarrásat leat birrasii 35 proseantta vástidan «juo» ja 28 proseantta «oalle vissásit juo».

Nuoraidkoordináhtorat Ánna-Katri Helander ja Anthoni Hætta muitaleaba ahte soai doaivuba sin áigut orrut Guovdageainnus gullevašvuođa dihte.

– Gullevašvuohta, sámegiella ja kultuvra leat hui dehálaččat midjiide, ja min nuoraide. Dáppe mii leat eanetlogus ja eat dárbbaš iežamet vieruid ja vugiid čilgedit nugo omd. stuora servodaga álbmogii, dadjá Hætta.

Nuorain geat leat 19-jahkásaččat dahje nuorabut leat birrasii 26 proseantta vástidan «in dieđe», 13 proseantta vástidan «oalle vissásit in» ja 9 proseantta leat vástidan «in». Sis geat leat gaskal 20 ja 29 jagi leat birrasii 14 proseantta vástidan «in dieđe», 15 proseantta vástidan «oalle vissásit in» ja 8 proseantta vástidan «in».

– Mun jáhkán dáppe lea láittas nuoraide geat eai leat mielde valáštallan fálaldagain dahje eai liiko mehciid vánddardit, mis váilot maŋŋel skuvlaáiggi deaivvadanbáikkit nuoraide, dadjá Hætta.

Loga maid:
Guovdageaidnu­laččat leat eanemus duhta­meahttumat suohkaniin 

– Dáppe leat unnán deaivvadanbáikkit

Nuoraidkoordináhtorguovttos čuovvuba ja geahččaba maid Ungdata loguid, ja doppe soai leaba oaidnán ahte nuorat váillahit deaivvadanbáikkiid.

– Nuoraidskuvllas vástidedje 65 proseanta ahte «fra nokså til svært dårlig lokaler for å treffe andre» ja joatkkaskuvllas 77 proseanta . Dat han hui čielgasit muitala ahte dáppe eai leat deaivvadanbáikkit ja ahte lea juoga maid nuorat ieža váillahit. Lunddolaš čoahkkananbáikkit leat dehálaš oassin nannet gullevašvuođa dovddu servodahkii ja erenoamážit nuoraide vuoi eai dovdda iežaset olggobealde, dadjá Hætta.

Ássiidiskkadeamis boahtá ovdan ahte nuorat váillahit astoáiggefálaldagaid ja ahte boahtteáiggis sii háliidivčče buoret fálaldagaid. Nuoraidkoordináhtorat jurddašeaba ahte dat sáhttá leat ággan dasa go nuorat eai áiggo orrut Guovdageainnus.

– Mis diehttelasat galggašedje eanet nuoraidfálaldagat vuoi min nuorat loktet orrut Guovdageainnus, dadjá Hætta.

Dávjá šadda maid nu ahte dat fálaldagat mat leat, dat mákset jus leat servviid dahje priváhta fitnodagaid bokte. Máilbmi lea muđuidge divron ja alla reanttut maid dagahit stuora olggosgoluid ovdamearka dihte váhnenolbmuide. Nuoraidkoordináhtorat oaivvildeaba dan stuora vahágin astoáigedoaimmaide.

Ii galggašii darbbahit válljet guđe fálaldahkii aigu ruđa bidjat, nuoraid- ja mánáidfálaldagaide galggašii sáhttit searvat beroškeahttá ruđalaš vuolggasajis.

Ánna-Katri Helander

– Juo, ja váhnenolbmui ii galggašii ruđalaš noađđinge jus leat máŋga máná geaid háliida astoáige doaimmaide mielde, joatká Hætta.

Bargagoahtán oažžut eanet deaivvadanbáikkiid

Nuoraide sáhttá leat váttis diehtit makkár fálaldagaid sii váillahit, dan dihte áiguba nuoraidkoordináhtorat buori gulahallama nuoraiguin ja sidjiide addit vejolašvuođa veahá ieža mearridit.

–Jus mii galgat ásahit dáppe nuoraidviesu nu movt Álttás ja Romssas leat dáhkan ja nagodan, de mii fertet ovttasbargat nuoraiguin. Nuoraid váldit mielde dakkár proseassaide ja bargguide lea hui dehálaš vuoi ii šatta dušše nu ahte mii rávisolbmot dál fuobmát juoidá. Sihke Romssas ja Álttás doibmet hui bures nuoraidviesut go nuorat leat ieža mielde hábmeme daid ja makkár fálaldagat doppe galget leat, dadjá Hætta

Helander ja Hætta muitaleaba ahte go leaba bargan nuoraiguin, de leaba vásihan ahte nuorat hohket kafea ja diekkár deaivvadanbáikkiid.

– Báikkit gosa besset dušše vuolgit deaivvadeami dihte, eaige dakkár lágiduvvon doaimmaide nugo spábbačiekčanhárjehallan dahje konsearta, muhto fálaldat ja doaibma gosa sáhttá dušše mannat ja leahkit iežas premissain, mun jáhkán dan váillahit min nuorat, dadjá Helander.

Gaskaneaset leaba nuoraidkoordináhtor guovttos humadan ja gávnnahan ahte kulturviessu livččii vuogas deaivvadanbáiki nuoraide.

– Mii leat goit dáppe bargame dan ovdii ahte mii galgat oažžut johtui eambbo bistevaš doaimmaid ja mii leat ságastallame dal dáppe ja ávžžuheame ahte kulturviessu galggašii vuoruhuvvot nuoraide ja ahte nuorat galggašedje deike beassat vuođđudit juoidá. Dáppe lea juo olu nugo lávdi, kafea, kulturskuvla ja girjerájus, ja deike livččii olu vejolašvuođat čohkket eará doaimmaid ge nugo Sámi Gamers searvvi, dadjá Hætta.

Loga maid:
Bivdet álbmoga evttohit masa sáhtáše  kulturviesu geavahit boahtte­áiggis

Ohcaba ovtasbargoguimmiid

Nuoraidkoordináhtorguovttos leaba dál leamaš barggus badjelaš mánu, ja leaba jo ollu ollen humadit maid galggašeigga bargat.

– Moai letne dál veahá badjelaš mánu bargan dáppe ja moai háliidetne goit rievdadit ollu dan movt suohkan jurddaša nuoraid doaimmaid ektui, ahte ferte fokuseret addit nuoraide fálaldagaid, dadjá Hætta

Soai leaba ohcagoahtán ovttasbargoguimmiid, ja leaba ásahan buori oktavuođa Sámi Gamersiin.

– Dán mánu rájes ja gitta juovlamánnui rahppo Sámi Gamers latnja, HQ nuvttá buot nuoraide. Mii leat fárrolaga lágideame «kick-off» miessemánu 23. beaivvi ja dat álgá diibmu 18:00 HQ:s. Dát lea fálaldat man sihke moai ja Sámi Gamers searvi leat háliidan bidjat johtui ja mii leat maid bargagoahtán dán ovttasbarggu viiddidit vuoi Sámi Gamers HQ sáhtášii leat nuvttá rabas maid boahtteáiggis, dadjá Hætta.

Sámi Gamers deaivvadanbáikkis leat ollu fálaldagat, ja vaikko olmmoš ii soaitte nu datte beroštit speallamis, de leat doppe maid eará diŋggat.

– Sis han lea maid stuora TV, biljárda- ja shuffleboard beavdi nu ahte doppe sáhttá olu eará ge bargat sin speallanlanjas. Dat šaddá hui buorre rabas fálaldahkan buohkaide nuoraidskuvlla ja joatkkaskuvlla agis, dadjá Helander.

Loga maid:
Sámi Gamersiid «gaming­­lanja» niehku lea viimmat olla­­šuvvan