Sáhtášit go don leat soapmása ustibin, leat ustit gii muhtumin fitná guossis ja geasa sáhttá čatnat ustitvuođabátti.
Jus vástidit «juo» dasa, de lea don olmmoš, gii heivet leat «galledanustibin» soapmásii gii lea olu okto. Birtavári Rukses Ruossa ohcá ge dál olbmuid geat sáhttet leat soapmása galledanustibin.
Gáivuona suohkana siiddus čilgejuvvo ahte galledanustit lea eaktodáhtolaš, gii bálkká haga galleda soapmása. Galledanustit lea dihto olbmo fásta ustit ja galgá finadit galledeame su oktii vahkkus dahje sáhttá maid eará soahpat dainna gean galleda. Jurdda lea ahte dat lea illun sihke galledanustibii ja sutnje gean galleda ja Rukses Ruossa geahččala stellet nu ahte galledanustibis ja sus gean galleda leat sullasaš beroštumit.
– Galledanustiba doaibma lea dakkár man árvvu lea váttis meroštallat, muhto maid diehtit buktá olu ilu ja lea ávkin olbmuide geat leat olu okto, lea diehtu Gáivuona suohkana neahttasiiddus.
Jus háliidat eambbo dieđuid dan birra dahje dieđihit iežat galledanustibin, de leat Gáivuona Eaktodáhtolašguovddáš, Birtavári Rukses Ruossa ja Gáivuona Dearvvašvuođasiida maiguin sáhtát váldit oktavuođa.
