Maja Kristine Jåma háliida boahtteáiggi boazodoalus. Su boahtteáigi lea dál áitojuvvon, go Jorpetjahkeii Fosenii lea plánejuvvon bieggamillopárka.
Maja Kristine Jåma lea Norgga Sámiid Riikkasearvvi (NSR) nuoraidlávdegotti stivralahttu.
Son lea bajásšaddan boazodoallobearrašis Åarjel Fovsen Njaarkes, ja háliidivččii boahtteáiggis maid leahkit boazodoalus.
Son cealká dál preassadieđáhusas ahte su boahtteáigi lea áitojuvvon, go sin orohahkii lea plánejuvvon Eurohpá stuorámus bieggamillopárka.
Goalmmádasoassi
Sin dálveeatnamiidda Jorpetjahkeii Fosenii galgá bieggamillopárka boahtit.
– Dát mearkkaša ahte massit goalmmádasoasi min dálveeatnamiin agibeaivái. Unnit guohtuneatnamat, mearkkaša unnit saji. Dál leat golbma bearraša geat johtet dán guovllus. Ferte go okta bearaš heaitit boazodoalus jus dát plánat čađahuvvojit? Balan mu boahtteáigi boazodoalus áitojuvvo jus dát prošeakta čađahuvvo, lohká Jåma preassadieđáhusas.
Son cealká maid ahte bieggamillohuksen ii dušše váikkut boazodoalu, muhto olles Lulli-Sámi servodaga.
– Boazodoallu lea min kulturguoddi, mii mearkkaša ahte boazodoallu lea veahkkin seailluheame Lulli-Sámi giela, árbevirolaš máhtu ja kultuvrra. Jus boazodoallu jávká, de áitá dat min giela ja kultuvrra maid.
Eahpádus lea go gánnáhahtti
Troandima várresátnejođiheaddji Holde Opoku (Ruoná birasbellodat) lea ovdal cealkán ahte Troandima suohkan ferte iežaset eaiggátvuođain geassit TrønderEnergi eret dán prošeavttas.
Dan doarju Jåma ja NSR nuoraidlávdegoddi.
– Lea ain eahpádus lea go servodatlaččat gánnáhahtti prošeakta, ja ášši lea ain riekteproseassas. Min mielas lea dohkketmeahttun go árbevirolaš sámi boazodoallu ja kultuvra galget duvdojuvvot eret dákkár prošeavtta dihte. Troandima suohkan ja eará almmolaš eaiggádat fertejit árvvoštallat lea go rievttes geavaheapmi almmolaš ruđain, loahpaha Jåma.
