Kárášjot Lista bovde álbmotčoahkkimiid boahtte vahkus, ulbmil čoahkkimin lea gullat álbmoga oainnu, ieš oamastit ja hálddašit luonddu ja eatnamii Kárášjoga gielddas.
Kárášjot Lista bovde álbmotčoahkkimiid boahtte vahkus, ulbmil čoahkkimin lea gullat álbmoga oainnu, ieš oamastit ja hálddašit luonddu ja eatnamii Kárášjoga gielddas.
Kárášjot Listu ii sáhte go ávžžuhit álbmoga sáddet oktasaš eanan-, hálddašan- ja geavahangáibádusa. Otne lea Finnmárkkuopmodat (FeFo) guhte hálddaša eatnamiid Finnmárkkus.
– Mis lea ollu luonddu resurssat, main sáhttá ráhkadit bargosajiid. Dál mii leat guossis iežamet eatnamiin, máksit divrasit divadiid ja šaddat gilvalit luonddu riggodaga alde.
Mii oaidnit dehálažžan ieža beassat mearridit iežamet riggodaga badjel, dadjá Gaup. Álbmotčoahkkin lea borgemánnu 19. beaivvi Kárášjoga servodatviesus.
Oaidná bargosajiid
Kárášjot Lista sátnejođiheaddjievttohas Sissel Gaup ii loga iežaset duđavačča FeFoin, hálu ja dáhttu lea ahte gielda ja álbmot ieža hálddašit gieldda riggodagaid. Son lohká duogáš áššis lea ahte sii vásihit Kárášjogas negatiiva ovdáneami ja oidnet dál dárbbu gáibidit oamastan- ja geavahanrivttiid gielddas, nannen dihtii vejolašvuođaid ovdánahttit gieldda.
– Mii oaidnit vejolašvuođaid, jus álbmot ja gielda hálddaša resurssaid ja eatnama de sáhttá ásahit bargosajiid, dadjá Sissel Gaup ja čujuha bargosajiide nu mo meahcásteapmi, turisma, guolásteapmi ja bivddu ja nu ain viidásat. Mis leat ollu vejolašvuođat, muhto FeFo lea cakkadan gieldda ovdánanvejolašvuođaid, lohká son.
Ođđa tienas gildii
Sissel Gaup čilge maid dan dietnasa maid FeFo otne fidne Kárášjoga riggodagas, lea ruhta maid gielda fidnešii ja dat boađášii gildii ávkin.
– Min oaidnu lea ahte lea dehálaš álbmot ieš beassá mearridit, ja dál bovdet álbmoga ovddidit jurdagiid ja oainnu. Ferten deattuhit ahte lea álbmot guhte mearrida háliidit go gáibidit oamastan- ja hálddašanrivttiid, nu ferte čađahuvvot álbmotjienasteapmi maŋŋá, čilge Gaup.
Álbmotcoahkkimii lea bovdejuvvon iešguđet logaldallit, maiddái FeFos boahtá logaldalli.
FeFo direktevra Jan Olli ii loga kommenteret Kárášjot Lista evttohusa gáibidit eananrivttiid ovdal go Finnmárkokommišuvdna lea geargan bargguin.
– Mus eai leat makkárge cealkámušat áššái, dadjá Olli.
Bivdá guorahallat váikkuhusaid
Kárášjoga sátnejođiheaddji Anne Toril Eiksen Balto ii loga diehttit ollus ášši birra, ja lohká váttis ovdanbuktit oainnu, son lohká ferte vuos gulaskuddat Kárášjot listuin sin jurdagiid.
– Gažaldagat lea mo galgá doaimmahit ja čađahit nu ahte doaibmá árgabeaivvis. Mu mielas orru oalle guhkes proseassa ovdal go nie guhkás joavdat ahte sáhttit oaivvildit lea go eavttuhus buorre vai ii. Mun áŋkke dáhttun oaidnit váikkuhusaid, lohká Balto.
(Ášši lea almmuhuvvon báberaviissas 15.08.15)
