Sámediggeáirras Piera Heaika Muotka oaivvilda dál livččii hui buorre vejolašvuohta Walt Disney:ii fuolahit ahte Frost čuovvolanfilbma dubbejuvvo sámegillii.
Duorasdat eahkeda almmuhii Disney ahte boahtá čuovvolanfilbma dan beakkán “Frost” filbmii. Filbma, mii lei H.C. Andersena “Muohtadronnet” muitalusa vuođul ráhkaduvvon, lea olu beliid ja inspirašuvnna viežžan dáža ja sámi kultuvrras.
Juoidá ruovttoluotta
Sámediggeáirras Piera Heaika Muotka oaivvilda dál livččii hui buorre vejolašvuohta Walt Disneyii fuolahit ahte Frost čuovvolanfilbma dubbejuvvo sámegillii.
– Alitstálut dahje blånissene lea diida mii dadjá ahte go luoikkaha juoidá, de buktá juoidá ruovttoluotta. Mearkkašivččii nu issoras olu sámi mánáide beassat iežaset filbmasáŋgáriid gullat ja oaidnit sámásteamen. Diibmá šattai Frost dat animašuvdnafilbma mii lea eanemusat dinen goassige, de mun rehkenastán ahte dien fitnodagas gávdnojit ruđalaš návccat báddet dan ođđa filmma sámegillii ge, dadjá Muotka.
Popkultuvra sáhttá gádjut
Diimmá čavčča de celkkiiga nuoraidorganisašuvnnat Noereh ja Sámedikki Nuoraidlávdegoddi (SáNul) ahte dáhtošeigga eanet filmmaid ja TV-ráidduid báddejuvvot/dubbejuvvot ja tekstejuvvot sámegillii. Muotka lea áibbas ovttaoaivilis.
– Vai mánáid ja nuoraid beaivválaš sámásteapmi nannejuvvošii, de fertejit gávdnot dákkár ođđaáigge fálaldagat sámegillii. Mun sávan ahte stuorra fitnodagat, nugo Walt Disney, sáhttá leat ofelaš, dadjá Muotka.
Sámis neavttárat doarvái
Sámediggeáirras oaivvilda ahte gávdno viiddis ja nana sámi neavttár- ja musihkkagelbbolašvuohta man Disney sáhttá ávkkástallat jus mat dubbejit Frost filmma sámegillii.
– Mis leat sámi teáhterbirrasat dego Beaivváš Sámi Našunálateáhter Guovdageainnus, Åarjelhsaemien Teatere Muofis ja vel Giron Sámi Teáhter ruoŧabealde, gos Disney soaittášii gávdnat neavttáriid jietnageahččaladdamiidda, loahpaha Muotka preassadieđáhusas.
