Ealáhus- ja guolástusdepartemeanta háliidit eanet reahkábivddu Barentsáhpái, ja leat sádden ášši gulaskuddamii movt olahit dan mihtu.
Ealáhus- ja guolástusdepartemeanta háliidit eanet reahkábivddu Barentsáhpái, ja leat sádden ášši gulaskuddamii movt olahit dan mihtu.
– Lea hástalus go reahkábivdu ii leat gánnáhahtti. Mii háliidit geahččat makkár doaimmat sihkkarastet eanet reahkábivddu Barentsáhpái, ja seammás eambbo vuođđoávdnasiid Davvi-Norgga reahkáindustriijai. Lea biologalaččat dohkálaš lasihit bivddu dán guovllus, lohká guolástusministtar Per Sandberg (Ovddadusbellodat) preassadieđáhusas.
Máŋga molssaeavttu
Departemeanta bovde gulaskuddanorgánaid ja earáid cealkámušaid buktit evttohusaide mat leat čilgen gulaskuddanreivves.
Fatnasat mat leat guhkit go 19,81 mehtera šaddet dál ohcat lobi bivdit reahkáid Barentsábis.
Departemeanta lea evttohan geassit ruovttoluotta passiiva bivdolobiid, alidit guhkkodatmeari, váldit eret guhkkodatmeari ja seammás ohcangáibádusa, dahje váldit eret ohcangáibádusa ja seammás geassit ruovttoluotta buot lobiid.
– Go lobit mat leat addon eai leat leamaš anus, de gáhččá dálá ortnet eret. Danne lea lunddolaš árvvoštallat heaittihit oalát, go dákkár ráddjemis ii leat olus ávki, seammás go hehtte ođđa aktevrraid, lohká Sandberg.
