-Almmuhus-
-Almmuhus-
SMÁVVAOĐĐASATHáliida čohkket bihtán- ja ubmi­sámegielat birrasiid

Háliida čohkket bihtán- ja ubmi­sámegielat birrasiid

-

-

Sámediggi háliida čohkket bihtán- ja ubmisámegielat birrasiid Norgga bealde ja čohkket oainnuid mo sáhttá ealáskahttit gielaid. 

Loahpageahčen njukčamánu lágida Sámediggi álbmotčoahkkimiid gielladili birra bihtán- ja ubmisámi guovlluin. Sámediggi háliida áinnas oainnuid goappašiid giellabirrasiin, das ahte makkár doaibmabijut galggašedje biddjot johtui ealáskahttindihte gielaid.

Álbmotčoahkkimiin galget leat logaldallamat gielladiliid birra ja álbmot sáhttá buktit cealkámušaid ja evttohit doaibmabijuid gielaid ektui. Álbmotčoahkkimiin šaddá maid čuovvoleapmi čielggademiin maid professor Jon Todal lea čađahan bihtánsámi ja ubmisámi gielaid birra.

Háliidit čohkket giellabirrasiid

Sámediggi háliida čohkket bihtán- ja ubmisámegielat birrasiid Norgga bealde, muhto mis lea maid ovttasbargu ja gulahallan Ruoŧa bealde giellabirrasiiguin, geat maid servet čoahkkimiidda.

– Bihtánsámi ja ubmisámi giellabirrasiid oaivilat ja dárbbut gielaid ektui leat hui dehálaččat viidáset prosessii ja maiddái dasa ahte oaidnit makkár resurssat gávdnojit olahanmuttus ealáskahttit gielaid sihke Norgga ja Ruoŧa bealde, lohká sámediggeráđđi Mikkel Eskil Mikkelsen (NSR) preassadieđáhusas. 

Giellaealáskahttin gáibida ollu áŋgiruššama sihke ovttaskas olbmuin, báikegottiin ja servodagas. Sámediggi sávvá danin ahte bihtán- ja ubmisámi giellabirrasat, geaidda dát ášši gullá, besset ovdanbuktit iežaset oaiviliid doaibmabijuid ektui.

Illudit deaivvadit 

–  Mii illudit deaivvadit nu oallugiiguin go vejolaš bihtán- ja ubmisámi giellaguovlluin ja sávvat buohkaide buresboahtima čoahkkimiidda mat leat buohkaide, lohká Mikkelsen.

Son čujuha ealáskahttinprošeavttaide sihke Anáris Suoma bealde ja Svahken Sijtes, gos leat nagodan háhkat buriid váikkuhusaid, dan oaidná das go eambbogat leat álgán aktiivvalaččat geavahit sámegiela, ja šaddan maid sámegielagin.

Sámediggi lágida bihtánsámi álbmotčoahkkima ovttasbarggus Duoddara Ráfe:in, dát lágiduvvo Nordlándda álbmotmeahcceguovddážis Stuorgiettis Saltdal suohkanis disdaga 29.03.22, dii. 17.00-21.00. Ubmisámi álbmotčoahkkin lágiduvvo Korgen vertshusas Hemnes suohkanis duorastaga 31.03.22, dii. 16.00-20.00, ovttasbarggus Hemnes ubmisámi forumiin.

-Almmuhus-