Norgga Sámiid Riikkasearvvi (NSR) listanjunuš lea dolkan go Norgga almmolašvuohta ii nagot váldit sámi psyhkalaš dearvvašvuođa duođas.
Gáise válgabiirre NSR listanjunuš Henrik Olsen lea dál almmuhan vihtta doaibmabiju maid NSR oaivvilda berrejit čađahuvvot buoridan dihte dili.
– Mis leat oalle duođalaš hástalusat psyhkalaš dearvvašvuođain sámi servodagas. Máŋgasat rahčet dáruiduhttima váikkuhusain iešguđetge láhkai, muhto maiddá fáktoriiguin mat bohtet das go eallit minoritehtadilis ja go min árbevirolaš ealáhusat leat deaddaga vuolde ain 2017:s. Dát dagahit ahte mis leat erenoamáš dárbbut heivehuvvot psyhkalaš dearvvašvuođasuddjemii, dadjá Henrik Olsen preassadieđáhusastis.
– Váilevaš ipmárdus dearvvašvuođadoaimmahagas
– Dađi bahábut leat menddo ollu ovdamearkkat das ahte báikkálaš dearvvašvuođadoaimmahat ii dovdda iežas ovddasvástádusa, ja danne ii nagot fállat heakkadárbbašlaš divššu. Sáhttá leat sáhka olbmo heakkas, muittuha Olsen.
Son čujuha čuovvovaš doaibmabijuide:
1: Ovddasvástádus SÁNAG:i (Sámi našunála gealboguovddáš -psyhkalaš dearvvašvuođasuddjen ja gárrendilledikšu) berre sirdojuvvot Finnmárkku buohcciviesus Davvi Dearvvašvuhtii, mii buorebut nagodivččii áimmahuššat SÁNAG našunála ovddasvástádusa.
2: SÁNAG:i ferte juolluduvvot doarvái ruhta vai sáhttá doaimmahit iežas našunála doaimma, ja vai sáhttá nannet doaimmas eanet báikkiin Sámis.
3: Gealbolasiheapmi suohkaniin gos ásset sápmelaččat, sápmelaččaid kultuvrra, historjjálaš vásáhusaid ja dálá dili birra.
4. Máhttojuohku gaskal SÁNAG ja suohkanlaš dearvvašvuođabálvalusa.
5. Kampánja Sámedikki bealis mii dagaha suohkaniid eanet dihtomielalažžan, mas leat dieđut sámi váttisvuođaid birra ja makkár ovddasvástádusat suohkaniin leat.
