Sámediggeráđđi bovde seminárii Sámediggái gaskavahku.
Semináras lea bajilčála «Sámit oidnosis almmolaš statistihkas ja guovddáš registariin – vejolašvuođat ja hástalusat».
Sámediggi lágida seminára skábmamánu 20. beaivvi diibmu 09.00 dán fáttá birra, gos ságastallan dihtorsihkarvuođas, personsuojis ja sámiid vejolaš registreren Álbmotregistarii ja láhkamearriduvvon dearvvašvuođa registariin lea guovddážis. Earret eará lea Norgga olmmošvuoigatvuođaid ásahusas (NIM), sámi dutkanbirrasiin ja Dihtorbearráigeahčus sáhkavuorru. – Dat ahte statistihkas álgoálbmogiid birra lea buorre kvalitehta lea oassi stáhta olmmošrievttálaš geatnegasvuođain, erenoamážit barggus go lea áigumuš duohtan dahkat ekonomalaš, dearvvašvuođa, sosiála ja kultuvrralaš vuoigatvuođaid, ja eastadan dihtii vealaheami, čállá Sámediggi.
Seminára lea rabas buohkaide.
