Vaikke Sámedikki bušeahtas čuoččui ahte sii áigot unnidit Sámi Našunálateáhterii doarjaga, de biehttala Sámedikki ráđđelahttu ahte sis lei dat ulbmilin.
Sámedikki ráđđelahttu, Henrik Olsen (NSR), deattuha Ávvirii ahte sii eai leat áigon unnidit teáhtera doarjaga, vaikke vel čuoččui ge dat bušeahtas.
Sámediggi lei čállán ná bušeahtas:
«2018-2021 áigodaga davvi-norgalaš kulturšiehtadusas lea Beaivváš Sámi Našunálateáhter váldon mielde šiehtadussii ásahussan ja oažžu 1,2 miljovnna ruvnno jahkái dán njealji jagi áigodagas. Sámedikki mielas lea danne lunddolaš veahá unnidit njuolggodoarjaga Beaivváš Sámi Našunálateáhterii.»
2,1 proseantta sidjiide maid
Olsen dáhkida ahte sii eai leat áigon sihkkut teáhtera doarjaga.
– Lei hálddahus mii lei evttohan sihkkut, muhto politihkalaččat mii eat hálit dan dahkat. Nu ahte Našunálateáhter maid oažžu 2,1 proseantta lasáhusa, lohká son.
Olsen ii áiggo dadjat man olu hálddahus lei evttohan unnidit doarjaga.