Guovdageaidnulaš Ole Martin Hætta lea fas vuodjigoahtán skohtergilvvuin, mannan vahkkoloahpa šattai goalmmádin Norggameašttirgilvvuin. Su áigumuš lea ollesáiggis hárjehallat ja gilvalit skohteriin.
Mannan vahkkoloahpa lágiduvvojedje Norggameašttir Snow-X gilvvut Tydalas. Guovdageaidnulaš Ole Martin Hætta šattai goalmmádin buoremussan Supercross luohkás.
– Ledjen dušše geahččaladdamin skutera. In leat hárjehallan, in ge mun galgan vuodjit gilvvuid dán jagi. Mu hárjehalli guovttos, Hugo Hætta ja Jostein Biti, bággiiga mu searvat gilvvuide. Go ovddeš Norgga- ja Eurohpámeaštárat hohkahallet mu, šaddá dieđusge miella vuodjit, lohká ilolaš bronsavuoiti.
Movttiidahttá
Norggameašttirgilvu lea Ole Martin Hætta comeback. Son ii leat gilvvohallan 2013 rájes go dalle cuvkii šušmi NM-gilvvuid oktavuođas.
– Mun in leat dan rájes čohkkán gilvoskuhteris. Lea hui somá fas vuodjit, ledjen masá vajálduhttán man somá lea gilvvohallat. NM-gilvvuid mihttu lei šaddat viđa buoremusaid searvái. Bronsa movttiidahttá ja čájeha ahte rupmašis lea vuoibmi ja ahte mus ain lea taleanta, lohká Hætta.
Gilvvohallá beassážiid
Ole Martin Hætta lei birgetmeahttun skutergilvvuin ovdal go lápmahuhtii juolggi. Son lohká NM-bronsa čájehit ahte sáhttá birgehallat jus fal bidjá buot fámuid skuhtervuodjimii. Guovdageaidnulaš searvá skohtergilvvuide ruovttubáikkistis ja kránnjágielddas Kárášjogas beassážiid.
– Mihttu lea vuoitit, nu lea álohii. Jáhkkán goit iežan fasket medáljja gilvvuin, lohká Hætta.
Háliida ollesáiggis gilvvohallat
Guovdageaidnulaš soaitá dušše geahččaladdamin ja hárjehallamin dán dálvvi, muhto boahtte áigodaga leat sus stuora áigumušat. Ole Martin Hætta ja su crossteam:a leat ohcamin ruhtadeddjiid vai beassá hárjehallat ja gilvalit olles áiggis.
– Mu mihttu lea vuoitit buot gilvvuid Norggas boahtte dálvvi vai beasan vuodjit sihke Eurohpá- ja máilmmimeašttirgilvvuid, loahpaha Hætta.
