Mánáidgárddiid haddemearri lea lassánan jahkásaččat 2014 rájes. Dál gorgŋe haddemearri badjel 3000 ruvdnui.
Logi jagi áigi ásahuvvui haddemearri Norgga mánáidgárddiin. 2014 rádjai mávssii mánáidgárdesadji eanemusat 2330 ruvnnu, muhto dan rájes lea haddemearri gorgŋon jahkásaččat.
Borgemánu 1. beaivvi gorgŋii mánáidgárddiid haddemearri 3040 ruvdnui. Dát haddemearri guoská buot Norgga gielddaide, earret go Oslo, gos eai leat dohkkehan haddegoargŋuma.
Bargiidbellodat oaivvilda ahte ráđđehus lea dájuhan bearrašiid main leat smávva mánát.
– Ráđđehus seastá 65 miljovnna ruvnnu jahkásaččat go lasihit mánáidgárdehattiid. Dát gokčá goluid mat gártet go leat vuolidan opmodatvearu, lohká Bargiidbellodaga jođiheaddji Jonas Gahr Støre NTB:i.
Boasttu čuoččuhusat
Ráđđehus divrudii mánáidgárddiid haddemeari 2015:s danin vai mánáidgárdesajit galge šaddat hálbbibun bearrašiidda mat dinejit vuollel 548 500 ruvnnu. Jagi maŋŋel fállagohte maid vahkkosaččat 20 diimmu nuvttá mánáidgárdeáiggi bearrašiidda geain lea heajos dienas.
Bargiidbellodaga mielas ii leat dát riekta ja oaivvilda ahte buohkat galggaše máksit unnit mánáidgárdesajiid ovddas. Diehto- ja integrerenministtar Jan Tore Sanner oaivvilda ahte Støre govvida haddegoargŋuma boastut.
– Sus lea boasttu ipmárdus go maŋimuš guđa jagis leat mii áŋgiruššan sakka buoredandihte mánáidgárdefálaldaga Norggas, ja dan gal jáhkkán váhnemat leat vuohttán. Mii leat lasihan bargiid, buoredan kvalitehta ja njeaidán hattiid nu ahte lea hálbbit bearrašiidda main lea unnán dienas, dadjá Sanner.
(©NTB)
