Statistihkkaguovddáža dieđuid mielde Murmánskka guovllus haddegoargŋun lea 15,4 proseanta go muđui Ruoššas lea 11,98 proseanta.
Dat dieđut bohte ovdan raporttas mii lea dahkkon skábmamánus.
– Sivvan haddegoargŋumii regiovnnas lea dat go lea unnon fálaldat muhtin gálvvuide, muitalit statistihkkaguovddážis B-port áviisii Murmánskkas.
Borramušat leat divron mannan áigodaga ektui 13,83 proseanttas 14,26 prosentii.
Ii-borramušgálvvuin lea haddegoargŋun 18,35 proseanta, mii lea 0,34 proseantta eanet go mannan áigodagas.
Statistihkkaguovddážis mearkkašit ahte sankšuvnnat Ruošša vuostá mat dagahit hástaleaddjin fievrridit gálvvuid riikii maid váikkuhit haddegoargŋumii. Dát váikkuha sihke fálaldahkii ja logistihkkii.
