Guovddášbellodaga sámediggejoavku lea bargagoahtán boahtte válgaáigodaga guvlui ja dál hábmegohtet válgaprográmma maid.
Guovddášbellodaga sámepolitihkalaš riikačoahkkin lea bellodaga alimus sámepolitihkalaš eiseváldi, ja sin jahkečoahkkimii Álttás, borgemánu 31. beaivvi ja čakčamánu 1. beaivvi, sádde juohke sámediggeválgabiire eanemusat vihtta áirasa.
Áššit maid riikačoahkkimis meannudit leat earret eará 2025-2029 válgaprográmma ja cealkámušat Guovddášbellodaga prinsihpaide ja doaibmaprográmmii. Riikačoahkkin vállje sámepolitihkalaš ráđi mii riikačoahkkimiid gaskkas lea Guovddášbellodaga bajimuš sámepolitihkalaš orgána. Sámepolitihkalaš ráđđi lea válgabiirriid ja sámediggejoavkku gaskalađas.
– Mii illudit deaivvadit riikačoahkkimis Álttás, ja dat šaddá hirbmat dehálaš riikačoahkkin gos mii hábmet Guovddášbellodaga sámepolitihka boahttevaš njealji jahkái. Lea álo buorre deaivvadit bellodatustibiiguin, ja mun sávan mis šaddet ollu ja buorit digaštallamat, vai njealje boahttevaš jagi maid olahit buori Guovddášbellodatpolitihka Sámedikkis, dadjá Guovddášbellodaga sámepolitihkkalašráđi jođiheaddji ja dálá sámediggeáirras Svein Leiros preassadieđáhusas.
