Luossahálddašeami dieđalaš ráđđi lea kárten guvžžáid dili Norggas. Measta bealli guvžámáddodaga lea heajos dásis. Luossadihkki váikkuha eanemusat dasa, muhto maid eanadoallu, čáhcefámoreguleren ja geaidnohuksen.
Luossahálddašeami dieđalaš ráđđi lea árvvoštallan 430 guvžámáddodaga miehtá Norgga, dieđiha Norgga Luonddudutkaninstituhtta (NINA) preassadieđáhusas.
–Leat čađahan hirbmat stuorra kártema ja geahččan makkár dilit váikkuhit guvžžámáddodahkii Norggas. Čájehuvvo olu máddodagain ii leat ráhpa dilli, lohká Luossahálddašeami dieđalaš ráđi jođiheaddji, Torbjørn Forseth.
Heajumus Oarje-ja Gaska-Norggas
Dušše 20 proseantta (85 máddodaga) kártejuvvon guvžámáddodagain árvvoštallet leat buori dahje hirbmat buori dilis. Measta bealli máddodagain árvvoštallet leat heajos dahje hui heajos dilis (208 guvžámáddodaga). Heajumus dilis lea guvžámáddodagain Oarje- ja Gaska-Norggas.
Luossadihkki váikkuha eanet guvžái go lussii, lohká Forseth. Raporta čájeha kárttas ahte Nuorta-Finnmárkkus ii váikkut luossadihkki nu olu guvžžáid, go Oarje- ja Gaska-Norggas.
Nu váikkuhit maid čáhcefámureguleren, eanadoallu ja geaidnohuksen guvžžá gođđamii, bajásšaddamii ja loaktimii. Ii ge mearra atte šat guvžái nu buori ceavzinvejolašvuođaid go ovdal.
Lobihis bivdu čuohcá
Maiddái lobihis bivdu lea váikkuhan hejot guvžámáddodahkii. Dutkit lohket dál, go dihtet mat váikkuhit guvžžá ceavzimii, de dihtet maiddái maid sáhttet dahkat.
