Gussa áiggui várjalit iežas gálbbi, ja fallehii nissonolbmo gii bahut roasmmohuvai dáhpáhusas.
Gussa áiggui várjalit iežas gálbbi, ja fallehii nissonolbmo gii bahut roasmmohuvai dáhpáhusas.
Lei duorastat iđit diibmu 09.30 go Nordlándda politiijat dieđihedje lihkohisvuođa. 57 jahkásaš nisu, gii lei návetbarggus, roasmmohuvai go gussa fallehii su ovtta oaminávehis Ranas Nordlánddas.
– Son lea stabiila dál, muhto son lea bahut roasmmohuvvan ja oažžu intensiiva divššu, dieđiha Helgelánddabuohcciviesu Rana ossodaga divššodeaddji doavttir Gard Stokke NRK:i.
NRK dieđuid vuođul galgá nisu geavvan gusa ja gálbbi gaskkii, mii dagahii ahte gussa rohkkáhii 57-jahkásačča. Girdiámbulánsa doalvvui nissonolbmo buohccivissui Mo i Ranai maŋŋel lihkohisvuođa. Bargobearrágeahčču lea maid ožžon dieđu ášši birra.
Gusat sáhttet maid fallehit
Veterinearainstituhta dutki Kristian Ellingsen-Dalskau muitala ahte gusain sáhttá leat garra dovdu várjalit gálbbi.
– Vaikko eanaš gusat leat hui lojit, de sáhttet suhttat go lea gálbi ja jus dovdet ahte gálbi uhkiduvvo, lohká son NRK:i.
Diibmá, miessemánus, jámii okta 80-jahkásaš nisu go gussa fallehii su Rødøy suohkanis Nordlánddas. Nisu lei geahččalan ovttas isidiin veahkehit gusa go lei gálbbi guoddime. Isit roasmmohuvai maid dáhpáhusas, muhto ii nu bahut. Bearáš válljii heakkahuhttit gusa maŋŋel dáhpáhusa.
(©NTB)
