Guovdageainnu Gurutbellodat lea mearridan geassádit ovttasbarggus eanetloguin Guovdageainnu suohkanstivrras.
Guovdageainnu Gurutbellodagas lei odne stivračoahkkin. Dál eahkes dieđihit Guovdageainnu Gurutbellodaga Facebook-siiddus ahte leat mearridan geassádit ovttasbarggus:
– Guovdageainnu Gurutbellodat lea mearridan geassádit ovttasbarggus eanetloguin Guovdageainnu suohkanstivrras. Lea váttis joatkit ovttasbarggu dan dilis mii lea čuožžilan maŋemus áiggi. Givssideapmi, áitagat ja rollaseaguheapmi lea dohkketmeahttun ja billista luohttevašvuođa politihkkáriidda ja Guovdageainnu beaggimii.
Vurdet ahte sátnejođiheaddji čorge áššiid
Viidáset čállet ahte Guovdageainnu Gurutbellodat vuordá ahte sátnejođiheaddji čorge áššiid mat leat čuožžilan sihkkarastin dihte bargoráfi sihke politihkkáriidda ja suohkanhálddahussii.
Ikte dieđihii Guovdageainnu Olgeš ahte geassádit ovttasbarggus eanetloguin.
Guovdageainnu suohkanstivrra eanetlogus leat leamašan Guovdageainnu Dáloniid listu (5 áirasa), Gurutbellodat (2 áirasa), Olgeš (1 áirras) ja Sámeálbmot listu (2 áirasa).
