Kárášjoga Gurutbellodat almmuhii duorastaga iežaset gielddaválggaid nominašuvnnalisttu, gos vuosttaš evttohassan lea Nils Nilsen Gaup (60). Dušše okta evttohas, Espen Theodorsen, gii lea 11 sajis, lea vuollel 30 jagi.
Dasa dadjá sátnejođiheaddji evttohas hui oktageardánis siva. – Nuorat eai duosta šat vuolgit listtuide ja lohket gieldda ollu moivviid čuohcan sidjiide, dovddasta Gaup.
Nuorat ballán
Gaup dadjáge nuoraid geaid bellodat lea viggan oččodit listui, lohket oaidnit daid ollu riidduid gielddas, earet eará medias, mat leamaš dán áigodagas, eaige háliit seaguhuvvot dohko.
– Nuorat leat cuiggodan dan garrasit ja lohket ahte eai háliit válljejuvvot gielddastivrii, muitala son.
Nuorat cuiggodit maiddái daid ollu heajos ságaid maid media lea ovdanbuktán.
Gaup dadjáge iežas duostat dovddastit, ahte dálá politihkkárat leat baldán gieldda nuoraid politihkkan.
Váidalahtti
Seammás lohká hui váidalahttin, go nuorat eai háliit oasálastit politihkkii.
– Dat ii leat buorre ahte mii boaresdiŋggat leat diekkár heajos gova addán politihkkáriin, mii leat ieža baldán iežamet nuoraid, dovddasta son.
Nils Nilsen Gaup dovddasta maiddái ahte dát leamaš dat váddáseamos áigodat, dan golmma áigodagas maid lea gielddastivrras čohkkán.
– Álgu vulggii jo nu boastut, eatge mii leat nagodan dan njulget, dadjá son.
Geahččalit movttiidahttit
Gaup lohká goittot sin Gurutbellodaga bealis geahččalit bidjat johtui doaimmaid, mat soaittášii movttiidahttit fas nuoraid beroštit politihkkas.
– Dat maid mun lean smiehtan, ahte mii leat nagodan ceggen nuoraid joavkku Álttás, gos ovdaolmmoš lea hui čeahpi. Mii áigut geahččalit bovdet su deike beaivvi ovdal skuvlaválggaid, muitalit nuoraide politihkka birra ja ahte eai dárbbaš ballat searvat politihkalaš bellodagaide, čilge Gaup.
Gaup lohká sin bovdet buot nuoraid dán čoahkkimii, eaige dušše gurut olbmuid ja sávvá sin maid nagodit cegget Gurut nuoraidjoavkku.
Buorre listu
Nils Nilsen Gaup lei árvvoštallan geassádit politihkkas dán áigodaga maŋŋel, iige lean jurddašan šat searvat listui, muhto ii sáhttán beahttit iežas bellodaga.
– Lea stuorra máilmme stuorra gutni munnje, vaikko duođas gal ledjen áigon veahá geahpedit dál politihka, go lean čohkkán gielddastivrras jo golbma áigodaga. Muhto ávžžuhedje nu garrasit mu váldit vel ovtta áigodaga, de vuollánin ja mihten vuolgit, čilge Gaup.
Muđui dadjá Nils Gaup duhtavažžan iežaset listtuin, mas leat 13 nama.
– Mis leat buorit olbmot, geat duođas áigot váldit politihkka. Mii leimmet sáhttit viežžat olbmuid vaikko man ollu jus leimmet áigut, dušše listtudeavddan, muhto eat oaidnán dasa dárbbu, deattuha son.
Gurutbellodaga gielddaválggaidlisttu 2015:
1. Nils Nilsen Gaup 1955
2. Elin Sandvik 1956
3. Evald Nordsletta 1958
4. Inger Anne Mienna 1962
5. Nils Rangvald Dalseng 1947
6. Henning Alstad 1953
7. Ellen Marie Gaup 1958
8. Kaare Theodorsen 1953
9. Vivi Dalseng Johnsen 1972
10. Nils Aage Joks 1962
11. Espen Theodorsen 1987
12. Per Inge Eira 1966
13. Anders Bæhr 1961
