-Almmuhus-
-Almmuhus-
OĐĐASAT Guovža speadjan lahka Šuoššjávrri

Guovža speadjan lahka Šuoššjávrri

-

-

Šuoššjávrri lulábealde lea guovža ikte speadjan áldoealus. Fiettar orohaga boazoeaiggát muitala ahte sis lea doppe áldoeallu, gos guovža lea ogohallan áldduid ja borran misiid.

Nils Mathis M. Sara muitala olles guokte guovžža leamaš ealu siste dán mánu.

– Dat álggii miessemánu 15. beaivvi. Dalle ledje guokte rávis guovžža, mat rohkkáhedje áldoealu.

 

Váillaha logenáre miesi


DOARVÁI GUOVŽŽAT: Boazoeaiggáda Nils Mathis M.Sara mielas orrot guovžžat doarvái ja sávvá oažžut báhčinlobi. 
Vuorkágovva: Inga Marie Guttorm

Son muitala ahte oktiibuot son váillaha logenáre miesi, maid oaivvilda guovžža borran.

– Dál lea okta guovža dáppe, dat lea ollen juo oalle ládje borrat misiid. Leat goit čieža miesi maid dál váillahan.

 

 

Doarvái guovžžat

Sara sávvá oažžut báhčinlobi guovžžaide, mat su mielas orrot lassánan maŋemus áiggi.

– Gal guovžžat goit orrot mu mielas doarvái, dat han dahket stuora vahága midjiide. Lean vihtta guovžža vuohttán oktiibuot dán jagi, ja mu mielas gal oččošii jávkadit muhtin ráje dain guovžžain.

 

 

Leamaš báikkis


GUOVŽŽALUOTTAT: Stáhta Luonddubearráigeahčču lea fitnat báikkis ja dárkkistan luottaid. Priváhta govva

Stáhta Luonddubearráigeahču boraspireovddasvástideaddji Finnmárkkus, Magne Aasheim, muitala ahte sii leat leamaš ikte báikkis ovttas boazoeaiggádiin.

– Mii vuhtiimet luottaid guovžža maŋis ja duođaštit dan ahte guovža lea oaguhan áldduid.

 

Doaivva oažžut báhcinlobi

Aasheim lohká sin rapporteren ášši Birasdirektoráhttii, geat fertejit váldit mearrádusa addo go báhčinlohpi.

Son jáhkká ahte lea vejolaš dan oažžut.

– Juo, in jáhke veadjetmeahttumin addit báhčinlobi, vaikko soaitá váttis dál nagodit dan báhčit. Livččii stuora ovdamunnin jus lea olu muohta go dan galgá báhčit, ja dál han lea muohta juo suddan oalle ládje. Sii fertejit váldit mearrádusa galgá go geavahuvvot skohter vai helikopter jus addo báhčinlohpi, lohká son.

 

 

- Advertisement -
-Almmuhus-